2022-ն այլևս պատմություն դարձավ՝ թերթելով հայ հասարակության ինքնիշխան պետականություն ու արդար երկիր ունենալու երազանքի ևս մեկ էջ

Սիրելի հայրենակիցներ, ընթերցողներ, գործընկերներ, մեր հայ ժողովուրդ...

Հայ ազգի համար ծանր էին նախորդ 3 տարին. պատերազմ, կորուստներ ու պանդեմիա, որոնց հետևանքներն անդառնալի են: Իսկ այս Նոր տարվա նախաշեմին էլ թշնամին, կենդանու մորթուց մուշտակ հագնող ու աղավնի սպանող կեղծ բնապահպաների անվան տակ, ներխուժեց մեր տարածք` պանդատ պահելով արցախահայությանը` մեր քույրերին ու եղբայրներին, մայրերին ու հայրերին...

Ինչո՞ւ այդպես ստացվեց. այս հարցը հնչեցնում են բոլորը, հասակնում շատերը, բայց զրո քայլ՝ մեղավորներին պատժելու, իրավիճակը շտկելու և հետագա հնարավոր կորուստները կասեցնելու ուղղությամբ...

Այս ֆոնին դժվար է ակնկալել բարեմաղթություն, հաջողություն, երջանկություն, ձեռքբերումներ, բայց պետք է հավատալ՝ դեռ ամեն ինչ կորած չէ, դեռ հնարավոր է եղածը փրկել...

NEWSPRESS.am կայքի ողջ անձնակազմը՝ հիմնադիր-տնօրեն Արիանա Հովսեփյանի գլխավորությամբ մաղթում է, որ 2023 թվականը լինի սիրո, հանդուրժողականության, համերաշխության, համբերության, խոհեմության տարի:

Խոհեմություն, լրջամտություն, վճռականություն ու գոնե միչ հայրենասիրություն` մեր երկրի ղեկավարներին։ Լուրջ քայլեր` քաղաքական ընդդիմությանը։

Համբերություն ու հանդուրժողականություն մեր հայ հասարակությանը:

Ցանկանում ենք, որ 2023 թվականը մեր մի պատառ դարձած երկրի համար լինի նվաճումների ու հաջողությունների տարի։

Առողջ միտք ու հոգի ենք մաղթում մեր հասարակությանը...

2022–ն էլ այլևս պատմություն դարձավ՝ թերթելով հայ հասարակության ինքնիշխան պետականություն ու արդար երկիր ունենալու երազանքի ևս մեկ էջ։

Թող 2023 թվականը լինի ավելի հաջող մեր պետականության պահպանման ու ոչնչացող արժեհամակարգի վերականգնման համար:

Թող ոչ մի արհավիրք չխաթարի մեր վաղվա սերնդի՝ հայ սերնդի ապագան։

Թող Նոր տարին արգասաբեր լինի ողջ հայության համար, լինեն նրանք թե՛ սփյուռքում, թե՛ Հայաստանում, թե՛ Արցախում։ Թող ի վերջո` բացվեն հայերի համար բոլոր փակ ճանապարհները, դռներն ու հնարավորությունները` ապրելու ազատ, ինքնիշխան ու առանց թուրքի Հայաստանում։

Թող հայությունը չբաժանվի ճակատների, սև ու սպիտակի, չարերի ու բարիների:

Թող առողջանա մեր վիրավոր բանակը ու շարունակի ռազմատենչ շնչով և հայրենասիրությամբ պաշտպանել երկրի սահմանները թշնամուց: Քաջություն, անկոտրուն կամք ու անձնվիրություն զինվորին։

Թող երբեք չթրջվեն մեր հայ զինվորին սպասող մոր ու հոր, քրոջ ու եղբոր, կնոջ ու երեխայի աչքերը...

Գնահատեք,պահպանեք ունեցածն ու մի տվեք թշնամուն... 

Փորձեք անարցունք դիմավորել Նոր տարին, եթե իհարկե կարող եք....

Շնորհավոր թող լինի Ամանորն ու Սուրբ Ծնունդը