Ասուլիս՝ «յուրայիններով». ինչպե՞ս են ընտրել 50 ԶԼՄ, երբ շատերն անգամ տեղյակ չեն ասուլիսից

Հունվարի 10-ին` երեքշաբթի օրը, Նիկոլ Փաշինյանը որոշել է ասուլիս հրավիրել։ Այս ասուլիսն իբր նախորդներից տարբերվելու է նրանով, որ այս անգամ Փաշինյանը կհանդիպի լրագրողների հետ, ովքեր իրենց հարցերը նրան կուղղեն դեմ առ դեմ:

Իհարկե, լավ է, բայց խնդիրն այն է, թե արդյոք բոլոր լրագրողները կկարողանա՞ն մասնակցել. բանն այն է, որ ասուլիսի մասին չի հայտարարվել ո՛չ կառավարության, ո՛չ էլ վարչապետի պաշտոնական կայքում ու ոչ էլ նույնիսկ Փաշինյանի ֆեյսբուքյան էջում (իսկ կար ժամանակ, երբ պատեհ ու անպատեհ առիթներով Փաշինյանը մեկ տողով կոչեր էր անում ու լուրեր հայտնում):

Ասուլիսից ընդամենը 2 օր առաջ` կիրակի օրը ուշ երեկոյան, Փաշինյանի ընտանիքին պատկանող լրատվական կայքը գրեց, թե՝ «եկող շաբաթ սպասվում է լրագրողների հետ հանդիպումով ասուլիս»։ Իսկ կոնկրետ ե՞րբ` կայքը չէր մանրամասնում...

Այս հրապարակումից 1-2 ժամ անց, պարզվեց, որ այլևս ոչ մի լրատվամիջոցի չեն գրանցում, քանի որ արդեն, իբր, 50 լրատվամիջոց են գրանցվել և «այլևս տեղ չկա...»:

Իհարկե, այստեղ հարց է առաջանում` այդ ո՞ր լրատվամիջոցներին են գրանցել:

NEWSPRESS.am-ի տեղեկություններով, անգամ կառավարության հավատարմագրված լրատվամիջոցներից շատերը տեղյակ չեն եղել ասուլիսի մասին, քանի որ նրանց պարզապես տեղյակ չեն պահել։

Թերևս կարելի է նաև կանխատեսել, թե գաղտագողի, սուսուփուս ու հատուկ ռեժիմով գրանցված ԶԼՄ-ների ներկայացուցիչների հարցերին ինչ պատասխաններ կտա Փաշինյանը: Ակնհայտ է, որ պատասխանները լինելու են թերի, լղոզված և ոչինչ չասող։

Պարզ է, չէ՞, որ կառավարության «սիրասուն»  լրատվամիջոցների լրագրողները ճշտող ու ավելի հստակեցնող պատասխաններ չեն պահանջի, իսկ ընդդիմադիր ԶԼՄ֊ների լրագրողներին (եթե իհարկե նրանք այնտեղ կլինեն), թույլ չեն տա լրացուցիչ հարցեր տալ` կամ պատճառաբանելով, թե` յուրաքանչյուրին մեկ հարց ու մեկ պատասխան է հասնում, կամ ժամանակ չկա, դեռ կվերադառնանք ձեր հարցին, կամ էլ մեկ այլ պատճառ կգտնեն` սուր հարցերից խուսանավելու համար։

Այնպես որ, ասուլիսին չմասնակցող լրագրողները ոչինչ չեն կորցնի:

Կմնան միայն բազում չհնչած կամ անպատասխան հարցեր, որոնց խելամիտ արձագանքերը գուցե կարող էին հստակեցնել Հայաստանի ու Արցախի կարգավիճակը, լույս սփռել բազում մութ խնդիրների վրա, բացել միջազգային հանրության ականջներն ու աչքերը, աշխարհին ստիպել հաշվի նստել մեր երկրի հետ ու... 

Մի խոսքով՝ չեն հնչի շատ հարցեր ու չեն լինի կտրուկ որոշիչ պատասխաններ, բայց փոխարենը Փաշինյանը կմանիպուլացնի բոլորին՝ ցույց տալով, թե ամեն ինչ նորմալ է, ոչինչ չի թաքցնում հանրությունից ու․․․ չի վախենում լրագրողների հետ հանդիպումից...

Արմինե Մկրտումյան