Արցախը շրջափակված չէ, այլ Արցախը հանձնված է Ադրբեջանին․ Էդգար Ղազարյան

Ես խնդրում եմ բոլոր վերլուծաբաններին, փորձագետներին և քաղաքական գործիչներին այլևս չգործածել Արցախի շրջափակում կամ բլոկադա բառերը, որովհետև իրականությունը, այս մեկ ամիսը ցույց տվեց, որ դա ոչ թե շրջափակում է, այլ սկզբունքորեն այլ երևույթ է։ Այս մասին «Հայելի» ակումբում տեղի ունեցած ասուլիսի ժամանակ ասաց ՍԴ աշխատակազմի նախկին ղեկավար Էդգար Ղազարյանը:

Վերջինս, պարզաբանելով իր ասածը, նշեց, որ Արցախը շրջափակված չէ, այլ Արցախը հանձնված է Ադրբեջանին և կտրված է կապը Հայաստանի հետ, ինչպես ի սկզբանե ցանկացել է Իլհամ Ալիևը։

«Այսինքն, եթե մենք մտածում ենք մեր հայրենակիցներին փրկելու մասին, ապա պետք է մտածենք, ոչ թե ճանապարհն ապաշրջափակելու և այլնի մասին, այլ Արցախի ժողովրդի ինքնապաշտպանությունը կազմակերպելու և Արցախի ժողովրդին տեղում փրկելու մասին։ Եվ փաստերից պարզ է, որ դա շրջափակում չէ։ Ռուսաստանի նախագահը հրավիրեց Ադրբեջանի և Հայաստանի արտաքին գործերի նախարարներին, որպեսզի քննարկեն տարածաշրջանային խնդիրները։ Բնականաբար, այս պահին կարևոր, կենսական ու արդիական խնդիրն Արցախը Հայաստանին կապող միակ ճանապարհի բացումն է, և ԱԳ նախախարը, խախտելով դիվանագիտական էթիկայի նորմերը, չի գնացել այդ հանդիպմանը։ Չի գնացել, քննարկել այդ հարցը կողմի հետ, որը պարտավորություն ունի ապահովել անխափան երթևեկությունն ու անվտանգությունը։ Դրանից հետո 2022թ․ դեկտեմբերի 26-ին և 27-ին, Նիկոլ Փաշինյանը գտնվել է Սանկտ Պետերբուրգում, որտեղ միաժամանակ ներկա են եղել ՌԴ նախագահ Վլադիմիր Պուտինն ու Ադրբեջանի նախագահ Իլհամ Ալիևը՝ նոյեմբերի 9-ի հայտարարությունը ստորագրած մարդիկ, և տեղի չի ունեցել եռակողմ հանդիպում։ Չնայած ՌԴ նախագահն ասաց, որ քննարկում եղել է, բայց դա պաշտոնական հաղորդագրություններում չի հիշատակվում։ Այսինքն՝ պաշտոնական հանդիպում, նոր հայտարարություն և այլն տեղի չի ունեցել։ Նիկոլ Փաշինյանը վերադառնում է Երևան ու Կառավարության նիստում հանձնարարություններ տալիս պարտավորություններ կատարելու»,- նշեց Ղազարյանը։