Երբ երկրի «հերն անիծած» իշխանության անդամ Քերոբյանը խոսում է նոր քաղաք կառուցելու մասին՝ կարելի է լրջորեն անհանգստանալ...

Էկոնոմիկայի նախարար Վահան Քերոբյանը Պետրոս Ղազարյանի հետ հարցազրույցի ժամանակ ասել է, թե անցում են կատարում ավելի խոշոր քաղաքաշինական ծրագրերի: Նա մասնավորապես նշել է, թե՝ Երևանում թաղամաս առ թաղամաս վերանորոգելու են, նոր թաղամասեր են կառուցելու, ինչպես նաև, ուշադրությո՛ւն, կառուցելու են նոր քաղաքներ...

Եթե այդ պահին Հանրային հեռուստաընկերության տաղավար ծափերով մտներ ԱԺ նախագահ Ալեն Սիմոնյանն ու բղավեր՝ «ծափ տվեք, արա», ապա այդ կրկեսային համարը լիարժեք կլիներ:

Իհարկե, Քերոբյանի խոսքերը կարելի էր ընդունել նաև չստացված հումոր, կատակ, որի վրա կարելի կլիներ նաև ծիծաղել, եթե իրականում պատկերն այդքան տխուր չլիներ:

Այս մարդը, ով դեռ 2020 թվականին «Մենյու» (menu.am) ընկերության հիմնադիր էր ու  արցախյան 44-օրյա պատերազմի ժամանակ, մեղմ ասած, այնքան էլ դրական չէր արտահայտվում գործող իշխանության մասին, հանկարծ համաձայնեց աշխատել նույն այդ չստացված կառավարության հետ ու նրանց հետ էլ երկրի տնտեսության  «հերն անիծել» (և ոչ միայն տնտեսության):

Համենայնդեպս, թվերը, որոնք ներկայացնում է Քերոբյանը որպես ձեռքբերում՝ իրականության հետ ոչ մի աղերս չունեն:

Պետք չէ լինել տնտեսագետ հասկանալու համար, որ ամեն օր ահագնացող գնաճը, արտագաղթն ու գործազրկությունն ամենևին տնտեսական աճ ու Քերոբյանի նկարագրած բարեկեցիկ կյանքը չեն:

Այսպես ասենք՝ գոյություն ունի իրականություն ու դրան զուգահեռ «Քերոբյանի աշխարհի պատրանք», որտեղ թվերը կրկնապատկվում են, աղքատությունը վերանում, աշխատատեղերը ավելանում... (ի դեպ, Նիկոլ Փաշինյանը մի առիթով, երևի անգիտակցաբար, հերքեց Քերոբյանին՝ հայտարարելով, որ աշխատանքի տեղերի ավելացումը կապված է ո՛չ թե գործազրկության նվազման, այլ ավելի շատ թաքնված աշխատատեղների բացահայտման հետ):

Մի խոսքով, հիմա էլ Քերոբյանը հայտարարում է նոր քաղաքներ կառուցելու մասին... 

Չգիտես՝ ծաղրո՞ւմ է, դիտմա՞մբ է անում, թե՞ պարզապես չի հասկանում՝ ինչ է խոսում:

Քերոբյանին շատերը համարում են անմեղսունակ, այսինքն՝ մեղք, հանցանք գործելու անընդունակ ու անկարող. այս դեպքում ասացեք խնդրեմ՝ ինչո՞ւ է համագործակցում, աշխատում (ինչպես կուզեք՝ ասեք) երկիրը կապիտուլյացիայի ենթարկելու մեջ մեղադրվող ու հող առ հող, համայնք առ համայնք, քաղաք առ քաղաք թուրքին հանձնող իշխանության հետ:

Ի՞նչ նոր քաղաք կառուցելու մասին է խոսքը, երբ եղածը տալիս են թշնամուն... 

Մի հարցնող լինի՝ որտե՞ղ, Ադրբեջանին հանձնած տարածքնե՞րում, թե՞ քաղաքի վրա նոր քաղաք են կառուցելու...

Այս առաջարկը գուցե իրատեսական լիներ մեկ այլ՝ հայրենասեր ու ազգանվեր իշխանության օրոք, բայց սա այդ դեպքը չէ:

Սա մի կողմից, մյուս կողմից էլ Քերոբյանի հայտարարությունը բավականին մտահոգիչ է, քանի որ երբ փաշինյանական թիմից որևէ մեկը խոսում է «նոր սխրանքների», «նոր առաջխաղացման», «նոր ձեռքբերումների» ու առավել ևս «նոր տարածքների» մասին (ինչպես ՀՀ ՊՆ Դավիթ Տոնոյանն էր ասում), ապա սկսում ես լրջորեն անհանգստանալ՝ թե այս անգա՞մ ինչն են պատրաստվում հանձնել իրենց թուրք եղբայրներին...

Արմինե Մկրտումյան