Նպատակահարմար չենք համարում այդ զորավարժությունների անցկացումը այս իրավիճակում․ Փաշինյանը՝ ՀՀ-ում ՀԱՊԿ զորավարժություններ անցկացնելու մասին

ՀՀ պաշտպանության նախարարն արդեն իսկ ՀԱՊԿ միավորված շտաբին գրավոր տեղեկացրել է, որ ՀՀ-ում նման զորավարժություններ անցկացնելն այս իրավիճակում նպատակահարմար չենք համարում, և այդ զորավարժությունները, ՀՀ-ում համենայնդեպս, այս տարի չեն կայանա։ Այս մասին ասուլիսի ժամանակ հայտարարեց Նիկոլ Փաշինյանը՝ անդրադառնալով ՀՀ-ում ՀԱՊԿ զորավարժություններ անցկացնելու մերժմանը։

Խոսելով ՀԱՊԿ-ի հետ հարաբերությունների մասին, Փաշինյանը նշեց, որ հարցի նրբությունները պետք է ավելի լավ հասկանալ։ ՀՀ-ի ձևավորման գործընթացում անկյունաքարային է եղել այն միտքը, որ ՌԴ-ն ՀՀ-ի անվտանգության երաշխավորն ու դաշնակիցն է։

«Պիտի ասեմ, որ մենք նույնպես հարցն ընկալել և ընկալում ենք այդպես։ 2020թ․-ի 44-օրյա պատերազմից հետո մեր առաջնային մտահոգությունն ու օրակարգն առաջին հերթին ՌԴ-ի հետ եղել է հետևյալը, որ մենք մտավախություններ ունենք, որ Ադրբեջանն ագրեսիվ գործություններ կձեռնարկի ՀՀ-ի միջազգայնորեն ճանաչված տարածքի նկատմամբ և սա եղել է ՌԴ-ի հետ մեր անվտանգային ոլորտի հաղորդակցության հիմնական թեման։ Այդ խոսակցությունները եղել են շատ կոնկրետ և այդ խոսակցությունների ադյունքում մենք ստացել ենք պաշտոնական հավաստիացումներ, որ ՀՀ-ի սահմանները կարմիր գիծ են մեր անվտանգային դաշնակիցների և գործընկերների համար»,- նշեց Փաշինյանը։