Սեպտեմբերի 13-14-ից 3 զինծառայողի գտնվելու վայրն անհայտ է․ Սարգսյանը հավաստիացրեց՝ արվում է ամեն ինչ՝ նրանց գտնելու համար

Սեպտեմբերի 13-14-ի՝ Ադրբեջանի ագրեսիայի հետևանքով մենք ունենք 224 զոհված զինծառայող, որոնց աճյուններն արդեն ամփոփվել են մայր հողին։ Եվ ունենք գտնվելու վայրն անհայտ 3 զինծառայող, որոնց հստակ գտնվելու վայրը պարզելու և նրանց մարմինները հնարավորության դեպքում դուրս բերելու ուղղությամբ իրականացվում են աշխատանքներ։ Այս մասին Ազգային ժողովում լրագրողների հետ ճեպազրույցի ժամանակ հայտարարեց Պաշտպանության փոխնախարար Արման Սարգսյանը՝ անդրադառնալով Վերին Շորժայի և Ջերմուկի հատվածներում 2022թ․-ի սեպտեմբերյան պատերազմից հետո զինվորների մարմինների դուրսբերմանը։ 

Սարգսյանը վստահեցրեց, որ ամեն ինչ արվում է, ընդհուպ՝ Ադրբեջանի հետ բանակցություններ վարելու միջոցով։ Որևէ խոչընդոտ չկա, որպեսզի հնարավորության դեպքում անմիջապես արձագանքելու։

«Տարվում են աշխատանքներ, որպեսզի կոմպրոմիսի եղանակով հնարավոր ստեղծվի արագ այդ մարմինները դուրս բերվեն։ Նշեմ նաև, որ մենք Կարմիր խաչի ներկայացուցիչների, անվտանգության ծառայության համապատասխան մարմինների հետ համագործակցությամբ ամենօրյա աշխատանքներ են տարվել։ Եթե կհիշեք, սկզբնական շրջանում մեր զոհերի թվականաը փոքր էր, հետո՝ տրամադրվեցին մարմիններ, որոնք ԴՆԹ փորձաքննության ենթարկվեցին»,- նշեց Սարգսյանը և ևս մեկ անգամ հավաստիացրեց, որ ամեն ինչ այդ ուղղությամբ արվում է։ 

Վերջինս նաև հույս հայտնեց, որ այդ հարցի լուծումը կտրվի։