Լաչինի միջանցքի փակումը սադրանք է, որի վերջնական նպատակը նոր ռազմական էսկալացիան է. Նիկոլ Փաշինյան

Լաչինի միջանցքի ապօրինի շրջափակումն Ադրբեջանի կողմից շարունակվում է արդեն 32 օր։ Երկուշաբթի օրը խափանվել է Լեռնային Ղարաբաղին Հայաստանի Հանրապետությունից էլեկտրական էներգիա մատակարարող էլեկտրագծի աշխատանքը։ Խափանումը տեղի է ունեցել Ադրբեջանի վերահսկողության տակ գտնվող տարածքում և մինչ այս պահը վերականգնողական աշխատանքներ իրականացնելու հնարավորություն չի ընձեռվել՝ ո՛չ Լեռնային Ղարաբաղի համապատասխան ծառայություններին, ո՛չ խաղաղապահներին, ո՛չ էլ որևէ տեղեկություն կա վերականգնողական աշխատանքներ իրականացնելու կամ ընթացքի վերաբերյալ։ Այս մասին այսօր ՀՀ կառավարության նիստի ժամանակ հայտարարեց Նիկոլ Փաշինյանը։

Նրա խոսքով՝ ԼՂ-ի համար էլէներգիայի խափանումը նոր պրոբլեմ է ստեղծել։ Սկսվել են հովհարային անջատումներ։ Մանկապարտեզները գործում են ոչ լիարժեք, այդ թվում՝ համապատասխան սննդի բացակայության պատճառով։ Փակվում են աշխատատեղեր՝ էլ ավելի սրելով սոցիալական վիճակը ԼՂ-ում։

«Հարգելի՛ ներկաներ, սիրելի՛ ժողովուրդ, իմ գնահատականները շարունակում են մնալ նույնը, որ Ադրբեջանի կողմից Լաչինի միջանցքի ապօրինի շրջափակումը, սեփական հայրենիքում ապրելու, ԼՂ-ի հայության կամքը կոտրելու նպատակ ունի, բայց հավատում եմ, որ այդ կամքն անկոտրում է։ Բայց մյուս կողմից մենք պետք է որոշակի պատկերացում ունենանք, թե ինչպես պետք է հանգուցալուծվի այս իրավիճակը։

Այս հարցում էլ, իմ ընկալմամբ, ԼՂ-ի ժողովրդի և իշխանության արձագանքը պետք է լինի ասիմետրիկ։ Ի՞նչ է սա նշանակում։ Առաջին հերթին վերջին տարիների զարգացումների, դրանց խորքային իմաստների և պատճառների հետ պետք է առերեսվել այն կտրվածքով, որ իրադարձությունների, իրադրությունների մեր գնահատակաները պետք է լինեն փաստահենք։ Այս առումով, առաջին հերթին պետք է խուսափել իրադրությունն էլ ավելի փակուղային դարձնող քաղաքական հայտարարություններից, որովհետև վերջնակետին հասնելու հստակ պատկերացումների չզուգորդված հայտարարությունները որևէ օգուտ չեն տալիս»,- նշեց Փաշինյանը։

Նա նաև հիշեցրեց, որ Ադրբեջանի և ԼՂ-ի միջև պետք է սկսվի քաղաքական խոսակցություն. «ԼՂ-ի մեր գործընկերները պետք է հնարավորություն չտան, որ որևէ մեկն իրենց մեղադրի կառուցողական խոսակցությունը խափանելու կամ նման խոսակցությունն անհնար դարձնելու մեջ։ Լաչինի միջանցքի փակումը սադրանք է, որի վերջնական նպատակը նոր ռազմական էսկալացիան է, ուստի չպետք է իրականացնել քայլեր, որոնք ցանկալի են ռազմական էսկալացիայի սցենարը մշակողների համար»։