Ադրբեջանցիները կապի դուրս չեն գալիս Լաչինի միջանցքի բացման հետ կապված. այս պահին որևէ շփում չկա. Ալեն Սիմոնյան

Ստեփանակերտի և Բաքվի միջև շփումների մասին խոսում են և Ադրբեջանի ղեկավարը, և Ղարաբաղի իշխանությունները: Այս մասին լրագրողների հետ զրույցում ասաց ՀՀ ԱԺ նախագահ Ալեն Սիմոնյանը:

Հարցին, թե ինքը գիտի՞, թե ովքեր են բանակցողները, քանի որ Արցախի պետնախարար Ռուբեն Վարդանյանը հայտարարել է, որ բանակցություն չկա, Ալեն Սիմոնյանը պատասխանեց. «Երևի Ռուբեն Վարդանյանն իրեն նկատի ունի, որովհետև իր հետ չեն բանակցի՝ հաշվի առնելով հայտարարությունները: Ես հիմա բանակցողի անուն չեմ տա, չեմ էլ կարող, որովհետեւ մինչև վերջին ժամանակները ես գիտեի ով էր խոսում, ինչպես էին խոսում: Նաև Արցախի նախագահի հետ կապ կար, տարբեր խողովակներով այդ խոսակցությունը գնում էր: Չէր էլ կարող չլինել: Պարզ է, որ իրենք ինչ-որ ձևով շփվում են, խոսում են: Այս պահին որևէ շփում չկա, ադրբեջանցիները կապի դուրս չեն գալիս Լաչինի միջանցքի բացման հետ կապված: Շփում կար մինև Լաչինի միջանցքի հետ կապված խնդրի կեսը, առաջին 15 օրվա ընթացքում այդ շփումները եղել են»:

Անդրադառնալով Ալիևի հայտարարություններին, թե ադրբեջանցիները պետք է վերադառնան «արևմտյան Ադրբեջան», Զանգեզուր, Ալեն Սիմոնյանն ասաց. «Եթե որևէ մեկն ուզում է ինչ-որ տեղ վերադառնալ, պետք է ատելության խոսքը վերացնի: Երկրորդը, մենք պետք է խոսենք Սումգայիթ ու Բաքու վերադարձող հայերի մասին: Ադրբեջանի նախագահը պետք է հիշի, որ ադրբեջանցիները, որոնք պատերազմի պատճառով լքել են Հայաստանը, ջարդերի չեն ենթարկվել, սպանություններ չեն եղել, ինչը տեղի է ունեցել Սումգայիթում, Բաքվում: Եթե իրենք իրենց դպրոցներում սովորում են, որ մենք թշնամի են, ո՞ւր են վերադառնալու: Կարծում եմ՝ սա ավելի շատ ներքին լսարանի և արտաքին լսարանում ինչ-որ հայելային տարբերակ ստեղծելու համար է ասվում: Ինքը փորձում է ամեն ինչ պրոյեկտի Հայաստանի վրա: Չեմ կարծում, որ դա հաջողությամբ կավարտվի»:

Անդրադառնալով հարցին, թե ինչու խաղաղապահներին չի հաջողվում բացել Լաչինի միջանցքը, ԱԺ նախագահը պատասխանեց. «Որևէ առարկայական բան չեն ասում: Ասում են՝ կանենք, կանենք: Էս արդեն 2 տարի է պատերազմից հետո ասում են՝ հեսա կլուծենք: Չկա որևէ հանդիպում, որ մենք Արցախի հարցը չբարձրացնենք: Այո, մեր կողմից կա հարց, պահանջ, որը մինչ այս պահը անպատասխան է մնում: Ես վստահեցնում եմ, որ ռուսաստանյան խոհանոցներում խոսվում է այն մասին, որ մենք Հայաստանին մենակ ենք թողել և սա հասկանալի է»: