Ճանաչելով Ադրբեջանի տարածքային ամբողջականությունը՝ ներառո՞ւմ եք Արցախը՝ այո կամ ոչ». իշխանական պատգամավորը հստակ չպատասխանեց

Մեր այն ժամանակվա դիրքորոշումն այն էր, որ մենք չպետք է վնասենք հայտարարություններով և այլնով, որպեսզի ճանապարհը բացվի։ Ճանապարհը մի ամիս է՝ բաց չէ և վերջն էլ չի երևում։ Այս մասին այսօր ԱԺ արտաքին հարաբերությունների մշտական հանձնաժողովում ասաց Ազգային ժողովի «Հայաստան» խմբակցության պատգամավոր Անդրանիկ Թևանյանը։

Նա հարց հղեց «Քաղաքացիական պայմանագիր» խմբակցության պատգամավոր Մարիա Կարապետյանին, թե Հայաստանի իշխանություններն ի՞նչ են անում և ի՞նչ են արել, բացի այն, որ հայտարարել են, որ մենք այլ անելիք չունենք, քան փող տալը և միջազգային ինչ-որ միջոցառումներ կազմակերպելը, որոնք զրոյական էֆեկտ են առաջացրել։

Թևանյանը շարունակելով հարցադրումը նշեց․ «Նիկոլ Փաշինյանը հայտարարում է, որ մեր ու Արցախի տեսակետները նույնական են, բայց մենք տեսանք, որ դրանք, մեղմ ասած, նույնական չեն։ Երբ Փաշինյանը հայտարարում է, որ Ղարաբաղի ժողովուրդն է որոշողը, ինքը չի կարող բանակցել նրանց անունից, այդ դեպքում ինքն իրեն ի՞նչ իրավունք է վերապահել Պրահայում որոշում կայացնել Ղարաբաղի ճակատագրի վերաբերյալ և հիմա էլ հայտարարություններ անել Ղարաբաղի մասով։ Ես ուղիղ հարցնում եմ՝ Ղարաբաղն Ադրբեջանի կազմում ներառելը բացառո՞ւմ եք, թե՞ ոչ։ Եվ ճանաչելով Ադրբեջանի տարածքային ամբողջականությունը՝ ներառո՞ւմ եք Արցախը՝ այո կամ ոչ»։

Ի պատասխան Թևանյանի հարցադրմանը ՔՊ խմբակցության պատգամավոր Մարիա Կարապետյանը հստակ չպատասխանեց «այո կա ոչ» հարցին և նշեց․ «Մեր քաղաքական ուժին արած դիրքորոշումների վերագրումները ճշմարիտ չեն։ Դուք Ձեր ձևակերպումներն եք անում, վերագրում մեզ դիրքորոշումներ, որոնք մենք չունենք։ Հետո խնդրում եք, որպեսզի ես հերքեմ կամ հաստատեմ։ Դիրքորոշումները, որոնք մենք արտաբերում ենք, պետք չէ ծավալել, Ձեր երևակայության ընթացքով զարգացնել։ Հայաստանը պատրաստ է փոխադարձաբար տարածքային ամբողջականության ճանաչմանը՝ 1991թ․ Ալմա Աթայի հռչակագրի հիման վրա։ Իսկ մնացածը Ձեր երևակայության հավելումն է»,- նշեց Կարապետյանը։

Թևանյանը հարց հղելով Կարապետյանին՝ ասաց, որ Փաշինյանն այլ բան է ասում, Ղարաբաղից այլ բան ենք լսում, հետևաբար ի՞նչ իրավունքով եք այդ դեպքում որոշումներ կայացնում, երբ հայտարարում եք, որ չեք զբաղվելու այդ հարցով և ղարաբաղցիները թող Բաքվի հետ խոսեն և այլն։

ՔՊ-ական պատգամավորն արձագանքելով ընդդիմադիր պատգամավորին՝ ասաց․ «Դիրքորոշումը, որը նաև հայտարարության տեքստում ամրագրված է, այն է, որ մենք․․․․»։

Չթողնելով շարունակել Թևանյանը պահանջեց իր հնչեցրած ուղիղ հարցին պատասխանել, թե արդյոք Ղարաղաղն իրենք ներառո՞ւմ են Ադրբեջանի կազմում, թե ոչ։ Կարապետյանն էլ ասաց, որ այդ կտրվածքով այդ հարցին չի պատասխանի։