«ՔՊ»-ն որոշել է չդիմել ՍԴ՝ ընդդիմադիր 22 պատգամավորի մանդատից զրկելու հարցով

«Քաղաքացիական պայմանագիր» խմբակցությունը որոշել է չդիմել ՍԴ՝ «Հայաստան» խմբակցության 22 պատգամավորի մանդատից զրկելուց հարցով։ Լրագրողների հետ զրույցում ասել է ԱԺ «Քաղաքացիական պայմանագիր» խմբակցության ղեկավար Հայկ Կոնջորյանն ասաց, որ որոշել են այս անգամ ևս չդիմել ՍԴ։

Իշխող ուժը նախաձեռնել է ընդդիմադիր «Հայաստան» խմբակցության 22 պատգամավորներին մանդատից զրկելու գործընթաց։ Իշխանությունների թիրախում, սակայն, առավելապես Իշխան Սաղաթելյանն է։ Մամուլում շրջանառվող տեղեկությունների համաձայն՝ իշխանությունները մտադիր են պատգամավորական մանդատից զրկել միայն Իշխան Սաղաթելյանին։ ԱԺ խորհրդի նիստը ընդդիմադիր պատգամավորներին մանդատից զրկելու համար ՍԴ դիմելու օրակարգով նախատեսված էր այսօր, սակայն մեկ շաբաթով հետաձգվել է, քանի որ ընդդիմադիր պատգամավորները չեն ներկայացել Խորհրդի նիստին։ ԱԺ կանոնակարգ սահմանադրական օրենքի համաձայն՝ պատգամավորի բացակայության դեպքում հարցի քննարկումը հետաձգվում է մեկ շաբաթով և վերսկսվում սահմանված ժամկետը լրանալու օրվան հաջորդող օրը հրավիրված Խորհրդի նիստում՝ անկախ նրա ներկայությունից:

«Մենք, այնուամենայնիվ, որոշել ենք այս անգամ ևս չդիմել Սահմանադրական դատարան և հնարավորություն տանք, որպեսզի այն քաղաքացիները, ովքեր իրենց ձայնը տվել են ընդդիմությանը, ներկայացված լինել Ազգային ժողովում։ Այս որոշումը նաև այդ քաղաքացիների, մեր քաղաքացիների քվեի նկատմամբ մեր ունեցած հարգանքի դրսևորումն է»,- լրագրողների հետ զրույցում ասաց Հայկ Կոնջորյանը։

Հարցին, թե արդյո՞ք դա օրենքի խախտում չէ, եթե օրենքը խախտել են ու չեն ներկայացել ԱԺ նիստերին, նա մանրամասնեց. «Եթե մենք առաջնորդվում ենք օրենսդրությամբ, ապա նորմն այն է, որ հարցը մտնում է Խորհրդի նիստի օրակարգ և դրանից հետո արդեն Խորհուրդը որոշում է, այսինքն Խորհրդին տրված է հայեցողությունը՝ որոշի դիմել Սահմանադրական դատարան, թե ոչ։ Օրենքի պարտադիր նորմը վերաբերում է օրակարգ մտնելու հարցին, և ոչ թե օրակարգում այդ հարցը հաստատելուն կամ չհաստատելուն։ Մեր դիրքորոշումն այն է, որ պետք է հնարավորություն տանք ընդդիմությանը գալ խորհրդարան և աշխատել։ Նախորդ անգամ, երբ այս հարցն առաջացել էր, մենք նորից այդ տրամաբանությամբ առաջնորդվեցինք, որ ընդդիմությանը շանս ենք տալիս, որպեսզի գան ու աշխատեն, ներկայացնեն իրենց ընտրողներին»։

Նրա խոսքով՝ իրենց այս որոշումը դեռ չի նշանակում, որ հաջորդ նման իրավիճակի դեպքում իրենք այլ որոշում չեն կայացնելու ու չեն դիմելու ՍԴ։