Սուտ է ու մանիպուլյացիա, Փաշինյանի ստորագրությունն է դրված նոյեմբերի 9-ի փաստաթղթի տակ. Վահե Հակոբյան

Քանի կա այս իշխանությունը, որևէ լուրջ հարց չեն կարող բարձրացնել, լուծել։ «Լույս թունելի վերջում» հարթակի չորրորդ՝ «Շրջափակված Արցախ. Ադրբեջանի ահաբեկչության, միջազգային անգործության և հանցավոր անտարբերության ճիրաններում» խորագրի ներքո քննարկմանն ասաց «Վերածնվող Հայաստան» կուսակցության նախագահ Վահե Հակոբյանը։

Նրա դիտարկմամբ, Հայաստանի իշխանությունները շարունակում են ամրապնդել իրենց որդեգրած քաղաքականությունը, որ որևէ գործ չունեն Արցախի հետ։

«Օրեր առաջ Նիկոլ Փաշինյանը հայտարարեց՝ նոյեմբերի 9-ի փաստաթղթի 6-րդ կետի առնչությամբ իրենք որևէ գործ չունեն։ Սուտ է ու մանիպուլյացիա, Փաշինյանի ստորագրությունն է դրված նոյեմբերի 9-ի փաստաթղթի տակ, և ուզի, թե չուզի կրում է պատասխանատվություն՝ չկատարաված պայմանավորածությունների համար»,–ասաց նա։

Նրա խոսքով, աշխարհաքաղաքական բախումների, մեծ խաղերի մեջ Փաշինյանն ու իր խմբակը փորձում են իրենց մանր ու փոքրիկ խաղիկները տանել, փոխանակ հարցեր ուղղեն նույն ռուս խաղաղապահ առաքելությանը, իսկ այդ հարցերը կան, օբյեկտիվ են ու ակնկալել պատասխաններ։ Ըստ պատգամավորի, իշխանություններն անում են հակառակը` շարունակում են փնովել խաղաղապահների հեղինակությունը, ինչով հող են նախապատրաստում ներգրավելու Արևմուտքին։

Վահե Հակոբյանն ընդգծում է` պարզ ու հստակ մեսիջ պետք է փոխանցել. «Այսօր այլընտրանք չկա, քան կիրառել «անջատում հանուն փրկության» բանաձև, այսինքն Արցախի ճանաչման հարցը պետք է այսօր սարքել օրակարգ, օրակարգում համար մեկ, միաժամանակ բացառենք, օրակարգերից հանենք, դուրս շպրտենք այն գաղափարը, որտեղ անգամ թեթև հնչում է թեզ, որ Արցախը պետք է լինի Ադրբեջանի կազմում, դա պետք է իսկապառ բացառենք»,–ասաց նա։

Ըստ պատգամավորի, ջանքեր պետք է գործադրվեն նաև միջազգային մեդիա դաշտում, որպեսզի նույն միջազգային հանրությունը հասկանա, որ միայն հայտարարություններ անելով, դատապարտելով Ադրբեջանի ագրեսիան, հռետորաբանությունը, ինչը բավարար պայման չէ, ընդ որում հաջորդ օրը երբ նույն Ադրբեջանի հետ կնքում են պայմանագիր։

«Ադրբեջանը պետք է հասկանա, ընկալի, որ նման տեռորիստական հռետորաբանությամբ, քայլերով կընկնի անդառնալի հետևանքների մեջ։ Մենք բոլորս պետք է ներգրավենք այս պրոցեսների մեջ»,–նշեց Վահե Հակոբյանը։