Գուցե փորձ արվի, որ պատգամավորներ մեկնեն Արցա՞խ. ընդդիմադիրը՝ Ալեն Սիմոնյանին

ՀՀ Ազգային ժողովի նիստի ժամանակ «Հայաստան» խմբակցության պատգամավոր Արծվիկ Մինասյանը հարց հղեց ԱԺ նախագահ Ալեն Սիմոնյանին՝ ասելով․

«Պարո՛ն Սիմոնյան, Դուք հանդիսանում եք Հայաստան և Արցախ միջխորհրդարանական հանձնաժողովի նախագահ, չնայած մի քանի անգամ ընդդիմությունն առաջարկել և պահանջել է, որ տեղին ունենա նիստը, բայց այդպես էլ չի կայացել։ Հիմա Դուք ի՞նչ կարող եք ասել այդ մասին։ Նախատեսվո՞ւմ է արդյոք ի վերջո հանդիպում, թե՞ ոչ։ Եթե ոչ, ապա այս պայմաններում գոնե քննարկում երկու խորհրդարանների պատգամավորների միջև։ Որպեսզի այս պայմաններում փորձենք համատեղ ելքեր գտնել»։

Ի պատասխան՝ ԱԺ նախագահ Ալեն Սիմոնյանը նշեց, որ նախատեսվում էր հանդիպում սեպտեմբերի 19-ին, բայց սեպտեմբերի 13-14-ի դեպքերի պատճառով այդ հանդիպումը հետաձգվեց։ «Իսկ ինչպես Դուք նշեցիք, ստեղծված իրավիճակում նման բան նախատեսելը մի քիչ դժվար է և այս պահին որևիցե նմանատիպ քննարկում չկա Արցախի մեր գործընկերների հետ»,- նշեց Սիմոնյանը։

Մինասյանն արձագանքելով հարցրեց, իսկ գուցե սա հենց այն լավ առիթն է, որ հնարավորություն լինի, թեկուզ՝ պատգամավորական այց Արցախ, որովհետև, ի վերջո միջխորհրդարանական համաձայնագիր կա, և որը ճանաչվել է միջազգային դերակատարների կողմից, ովքեր ընդունել են, որ Հայաստանը նույնպես հանձնառու է Արցախի ժողովրդի անվտանգության ապահովման տեսանկյունից։ Մինասյանը նաև առաջարկեց քննարկում կազմակերպել թեկուզ առցանց մակարդակով, զուտ ելնելով նաև այն հանգամանքից, որ միջազգային հանրությունը պետք է տեսնի, որ ստանձնած պարտավորությունները, որոնք ճանաչվել են նաև իրենց կողմից, այնուամենայնիվ, պետք է կյանքի կոչվեն։ 

«Լաչինի միջանցքի փակ լինելու պատճառով չեմ պատկերացնում, թե մեկնելու Ձեր առաջարկն ինչպես կարելի է իրագործել։ Առցանցի մասին կարելի է քննարկել, հասկանալ։ Եթե նման հնարավորություն տեսնում են նաև Արցախի մեր գործընկերները, ապա ինչու ոչ»,- նշեց Սիմոնյանը։