Գեներալը ՊՆ-ի հողը գնել է 25 միլիոն դրամով, վաճառել՝ 420 միլիոնով. գնորդն Իշխան Զաքարյանի որդու ընկերն է

Հետքը գրում է՝ Երևանի Նոր Նորք վարչական շրջանում ծրագրվում է 20 հարկանի բազմաբնակարան շենք կառուցել։ Դրա համար նախատեսված հողամասը տարիներ առաջ հատկացվել էր Պաշտպանության նախարարությանը։

Հողամասը ՊՆ-ից 25 միլիոն դրամով (62.5 հազար դոլար) ձեռք է բերել Գլխավոր շտաբի սպառազինության վարչության նախկին պետ, այժմ ԳՇ պետի օգնական Պողոս Պողոսյանը։ Պատերազմից անմիջապես հետո նա հողամասը նվիրել է իր զոքանչին։ Իսկ այս տարվա սեպտեմբերին, երբ Ադրբեջանը հարձակվեց Հայաստանի վրա, նույն հողամասը 420 միլիոն դրամով (1միլիոն 40 հազար դոլար) վաճառել են ԱԺ պատգամավոր Իշխան Զաքարյանի որդու ընկերոջը։

5420 քմ հողամասի սեփականաշնորհման պատմությունը մենք սկսեցինք ուսումնասիրել 2020 թ-ին, մինչ պատերազմը։ Մեր հարցումներից հետո Հակակոռուպցիոն կոմիտեում քրեական գործ հարուցվեց։ Պարզվում է, որ հողամասի վերջին օտարումը տեղի է ունեցել քրեական գործի նախաքննության ժամանակ՝ Հակակոռուպցիոն կամիտեի լուռ համաձայնությամբ։

Կադաստրի կոմիտեից ստացված տվյալների համաձայն, 5420 քմ հողամասը Պաշտպանության նախարարությունը 2013 թ.-ին վաճառել է Պողոս Պողոսյանին։ Ըստ ՊՆ-ի` հողամասի վաճառքի գինը կազմել է 25 միլիոն 215 հազար 556 դրամ։ Նախարարությունը հրաժարվել է տրամադրել հողամասի օտարման հիմքերը՝ պատաճառաբանելով, թե վաճառքի բոլոր փաստաթղթերը, բացառությամբ պայմանագրի, ոչնչացվել են։ Նախարարության հիմնավորումն այն է, որ փաստաթղթերի պահպանության ժամկետն անցել է, ուստիեւ ոչնչացվել են։

Հողամասը գնելիս Պողոս Պողոսյանը զբաղեցնում էր ՀՀ ՊՆ 2-րդ բանակային կորպուսի հրամանատարի պաշտոնը։ Հողամասը ձեռք բերելուց 3 տարի անց՝ 2016 թ.-ին Պողոսյանը նշանակվում է Գլխավոր շտաբի սպառազինության վարչության պետ։

2020 թ.-ի սեպտեմբերին, երբ Ադրբեջանը լայնամասշտաբ հարձակում էր ծրագրում Արցախի վրա, Պողոս Պողոսյանը որոշում է վաճառել հողամասը։ Այդ մասին իմանում ենք հողամասի վրա տեղադրված «վաճառվում է» ցուցանակից։

2022 թ.-ին Հայաստանում քաղաքական իրավիճակը խաղաղվում է, ռազմական իրադրությունը` սրվում։ Ադրբեջանական ուժերը սեպտեմբերին հարձակվում են արդեն Հայաստանի վրա։ Նույն ժամանակահատվածում Պողոս Պողոսյանը փորձում է ավարտին հասցնել ՊՆ-ից ընդամենը 25 միլիոն դրամով ձեռք բերած հողամասի վերջնական օտարումը։ Գեներալին հաջողվում է հողամասը վաճառել 420 միլիոն դրամով։

                          Ո՞ւմ է վաճառվել հողը, և ի՞նչ են ծրագրում կառուցել

Պողոս Պողոսյանի զոքանչից 5420 քմ մակերեսով հողամասը այս տարվա սեպտեմբերի 20-ին գնել է Գարուշ Պապիկյանը։ Հանրության ուշադրության կենտրոնում Գարուշ Պապիկյանը հայտնվեց 2019-ի մարտին, երբ նրա ընկերությունը սկսեց Ազգային ժողովի մաքրությունն իրականացնել։

Գարուշ Պապիկյանը Ազգային ժողովի պատգամավոր Իշխան Զաքարյանի որդու՝ Վարդան Զաքարյանի ընկերն է։ Իշխան Զաքարյանի փեսայի՝ Խաչատուր Սաֆարյանի հետ էլ բիզնես-գործընկեր է («Քլիներս» ՍՊԸ-ի բաժնետերերն են)։

Գարուշ Պապիկյանը հողամասի համար բանակցել է Պողոս Պողոսյանի հետ, բայց փաստաթղթերով գնել է Լուսիկ Հովսեփյանից։ Հողամասը վաճառվել է 420 միլիոն դրամով, որից 404 միլիոն դրամը Գարուշ Պապիկյանը «Ամերիբանկից» վարկ է վերցրել, իսկ 16 միլիոնը վճարել է իր միջոցներից։

Մանրամասները՝ սկզբնաղբյուր կայքում։