Ռուսաստանն արգելեց Հայաստանից մսի ու կաթնամթերքի ներկրումը

Դեռևս 2015թ-ին խուլ շշուկներ կային, որ Արմավիրի մարզում դաբաղ հիվանդություն է տարածված: Հիվանդության տարածվածության մասին լիազոր մարմինը` սննդի անվտանգության պետական ծառայությունը, որևէ տեղեկություն չի հրապարակել: Կարճ ասած կոծկել է իրողությունը:

Այն, որ Հայաստանում դաբաղ կար, պարզ դարձավ միայն «Россельхознадзор»-ի հրապարակումից, այն է` հունվարի 20-ից ժամանակավորապես արգելվել է Հայաստանից մի շարք գյուղմթերքների, այդ թվում՝ մսի, կաթնամթերքի ներմուծումը Ռուսաստան։ Արգելքը պայմանավորված է Հայաստանում դաբաղ հիվանդության հետ։ Մեծ ռիսկեր կան, որ ներմուծվող գյուղմթերքների հետ այդ հիվանդությունը կարող է ներթափանցել Ռուսաստան:

Արգելվում է խոզի, ոչխարի, այծի, ցուլի, գոմեշի, տավարի մսի, ինչպես նաև կաթից ստացված մթերքների ներմուծումը, բրդի, կաշիների, մորթիների ներմուծումը:

Այսօր միայն Սննդի անվտանգության պետական ծառայությունը հաղորդագրություն է տարածել, որտեղ ասվում է, որ Արմավիրի մարզի ՝ Թուրքիային սահմանակից գյուղերից մեկում գրանցվել է կենդանիների դաբաղ հիվանդության մեկ դեպք: Իրանի Իսլամական Հանրապետությունում և Թուրքիայի Հանրապետությունում վերջերս գրանցվել են նոր՝ AG-VII շճատեսակից դաբաղ հիվանդության դեպքեր:

Հատկանշական է, որ մեկ դեպքով Ռուսաստանը հաստատ Հայաստանից ներկրվող գյուղմթերքի, մասնավորապես, մսամթերթի վրա արգելանք չէր դնի, նաև ՍԱՊԾ-ն նշված մեկ դեպքը անհնարին է, քանի որ դաբաղը լինելով սուր վարակիչ հիվանդություն, արագ տարածվում է, կենդանուց նաև փոխանցվում է մարդուն:

Դաբաղը ուղեկցվում է տենդով, բերանի, լեզվի լորձաթաղանթի վրա, ինչպես նաև միջմատային ծալքերում ու եղունգների շուրջը առաջացած բշտիկներով, որոնք կարճ ժամանակում փոխարինվում են խոցերով։

Նշենք, որ 2015թ-ին Հայաստանի մի քանի մարզերում, մասնավորապես Արարատ, Արմավիր, Սյունիք, Կոտայք և այլն տարածված էր թեյլերյոզ հիվանդությունը, ՍԱՊԾ-ն նշեց անկման միայն 5 դեպքի մասին, այն դեպքում, որ թեյլերյոզի տարածվածությունը բավականին մեծ էր, անկումներ ևս կային, տեղեկություններ կային, որ հիվանդ կենդանու միսը վաճառվում է ԳՈՒՄ-ի շուկայի հարակից տարածքում, այսպես կոչված «ժեխ» ծախողների կողմից, ովքեր էժան ու անորակ մսի առք ու վաճառքով են զբաղված:

Ստացվում է, որ բնակչությունը այս ընթացքում գնել և սնվել է թե թեյլերյոզով, թե դաբաղով հիվանդ խոշոր եղջերավոր կենդանիների մսով, առանց իմանալու այդ մասին, քանի որ ՍԱՊԾ-ի հոգսը մսամթերքի արտահանումը կատարելն է, իսկ այն, որ բնակչությունը սնվում է հիվանդ մսով, դա արդեն ՍԱՊԾ-ի հոգսը չէ:

Ոչ բնակչությունը շահեց ՍԱՊԾ-ի գաղտնապահությունից, ոչ էլ առավել ևս երկիրը, քանի որ ՌԴ-ն արդեն արգելանք է կիրառել և մսամթերքի արտահանման կազմակերպումը կառույցը ինքն իր ձեռքով պարզապես թաղեց, քանի որ ՌԴ-ի համար երկիրը արդեն անվստահելի է, որը ոչ միայն ոչինչ չի անում կանխելու հիվանդության տարածումը, այլև թաքցնում է իրավիճակը սեփական ժողովրդից: