Հանգի՛ստ թողեք մամուլին. լրատվամիջոցներն արձագանքում են ՔՊ-ական պատգամավորին. «Ժողովուրդ»

«Ժողովուրդ» օրաթերթը գրում է.

«Լրագրողների իշխանություն» համարվող ՔՊ-ն երեկ հերթական անգամ աչքի ընկավ ընդդեմ լրագրողների իր հերթական նախաձեռնություններով և հայտարարություններով:
Այս անգամ էլ հերթը Զարուհի Բաթոյանինն էր: Արցախում ստեղծված աղետալի իրավիճակը մոռացության տված՝ պատգամավորը երեկվա կառավարություն-ԱԺ հարցուպատասխանի հանկարծ հիշել էր լրագրողներին:

Ըստ իշխանական պատգամավորի՝ լրագրողների գործունեությունը վտանգ է ներկայացնում մարդկանց առողջության և պետության համար :

«44-օրյա պատերազմի ժամանակ մենք դեպքերի ականատես եղանք, որ մեդիամասնագետները, լրագրողներն այնպիսի բովանդակություն էին տարածում, որը վտանագավոր էր ոչ միայն քաղաքացիների առողջությանը և կյանքի համար, այլ կարող էր պետական անվտանգության խնդիր առաջացնել». սա Բաթոյանի՝ ԱԺ երեկվա նիստին հնչեցրած «փայլուն» միտքն է:

Բանն այն է, որ պատգամավորին չի բավարարում կառավարության հեղինակած «Ռազմական դրության իրավական ռեժիմի մասին» օրենքում փոփոխություններով նախատեսված մեդիասահմանափակումները: ՔՊ-ական պատգամավորը կարծում է, որ նախագիծը «լավարկման» կարիք ունի, թերևս նկատի ունենալով, որ սահմանափակումները պետք է էլ ավելի խստացվեն:

«Ժողովուրդ» օրաթերթի հետ զրույցում «Հրապարակ» թերթի գլխավոր խմբագիր Արմինե Օհանյանն արձագանքում է՝ «Իշխանությունն այնքան շատ վնաս է հասցրել երկրին, բնակչության առողջությանը, բնակչության ապագային, որ մենք հազարապատիկ հրապարակումներ էլ անենք՝ չմտածված, վտանգավոր, վնասի չափին չենք կարող անգամ մոտենալ, դրանք սար ու ձորի տարբերություն են: Ավելի ճիշտ կլիներ, որ իրենք մի օրենք ընդունեին, որ ՔՊ-ականները, իրենց իշխանության ներկայացուցիչները զրկված լինեին որևէ հայտարարություն անելու , հոդված գրելու, հարցազրույց տալու հնարավորությունից»,-ասում է նա:

Yerevan.today կայքի գլխավոր խմբագիր Սևակ Հակոբյանն էլ նշում է՝ պետությունը և պետականությունը վտանգի տված, երկու հանրապետություններից մեկը հանձնած, մյուսի պետականությունը «վարի տված» ուժի ներկայացուցիչը ինչպե՞ս կարող է ինչ-որ լրատվամիջոցի մեղադրել նման բանի մեջ.

«Սա ուղղակի ցնդաբանություն է: Կառավարության հետ հարցուպատասխանի ժամանակ Նիկոլ Փաշինյանն ասում է, որ պատրաստվում է հավանության տալ խաղաղության պայմանագրի արևմտյան տարբերակին, իսկ դրա գաղտնազերծված տարբերակով՝ Արցախը հանձնվում է Ադրբեջանին, ո՞նց կարող է երկիրը հանձնած ուժի ներկայացուցիչն ասի, որ որևէ լրատվամիջոցն ինչ-որ վնաս է տվել, անգամ նման բովանդակության մեջ մտնելու իրավունք չուներ նա»,-ասում է զրուցակիցը:

«Ժողովուրդ» օրաթերթի գլխավոր խմբագիր Քնար Մանուկյանն այս առիթով ասաց, «Օրինակելի կլիներ, եթե Բաթոյանն իր թիմակիցներիբկողմից ուղղորդվող անորակ լրատվություն հաղորդող անհասցե կայքերի փակումից սկսեր իր սահմանափակումների ակցիան: Մարդկանց ուղեղները լվացող, ցածրորակ լուրեր հաղորդող իշխանական կայքերի պատերազմական սուտ լուրեր տարածող կայքերը թողած, ի՞նչ սահմանափակումներից է խոսում պատգամավորը: Հերի՛ք է մամուլին ճնշեք. Երկիր մեդիա հեռուստաընկերություն են փակում, զարգացնում պերֆեկթիվիներ ու դեռ խոսում որակյալ լրագրությունից»,-ասաց Քնար Մանուկյանը։

Ամբողջությամբ հոդվածը՝ «Ժողովուրդ» օրաթերթի այսօրվա համարում։