Առավոտյան արդեն կա ձերբակալված առաջին անձը. Վարդապետյանը հրդեհի հետևանքով զոհված զինվորների գործից մանրամասներ է հայտնում

Այսօր առավոտյան արդեն ձերբակալվել է առաջին անձը, ում նկատմամբ հանրային քրեական հետապնդում է հարուցված: Թույլ տվեք նախաքննության շահից ելնելով՝ չբացահայտել այն անձանց հաջորդականությունը, ում նկատմամբ այս գործողություններն իրականացվելու են: Այս մասին ՀՀ կառավարության նիստի ժամանակ հայտարարեց ՀՀ Գլխավոր դատախազ Աննա Վարդապետյանը՝ խոսելով Գեղարքունիքի մարզում գտնվող զորամասերից մեկի կացարանում բռնկված հրդեհի հետևանքով զոհված զինվորների դեպքի քրգործի մասին: 

Վարդապետյանի խոսքով՝ Դատախազությունը զինդատախազի մակարդակով ամենօրյա հսկողություն է սահմանում գործընթացի նկատմամբ և կոնկրետ սահմանված ժամկետներ կան քննությունն ավարտելու ուղղությամբ: Դրա մասին պարբերաբար զեկուցվում է, և նախաքննության շահից ելնելով այս պահին պարզապես չեն բարձրաձայնվի: 

«Բոլոր անձանց նկատմամբ նաև խափանման միջոցի հարցերն են քննարկվելու և դրանց ուղղությամբ կան ստրատեգիական լուծումներ: Համադրվում են կանոնադրությունները, կանոնագրքերը, բոլոր ժամկետային նորմերը և քրեաիրավական արգելքները՝ հասկանալու համար, թե ով և ինչ չի արել անվտանգության կանոններն ապահովելու տեսանկյունից: Բացի այդ զեկուցեմ, որ 23.01.2023թ-ին Զինդատախազի կողմից հրաման է արձակվել բոլոր կայազորներին զինվորական դատախազներին՝ ամենասեղմ ժամկետում տրամադրել տեղեկատվություն բոլոր զորանոցներում այդ թվում՝ տեղակայված զորանոցներում՝ 2020-2022թ.-ի ռազմական գործողությունների հետևանքով տեղափոխված զորանոցներում տեղակայված զորամիավորումների կենցաղի և կենցաղավարման կանոնների հետ կապված: Իհարկե, այստեղ առաջնություն է հրավտանգ նյութերի հետ աշխատանքը, սակայն մյուս անվտանգային կանոնները ևս ներառված են ցանկում: Օրինակ՝ կա՞ արդյոք երկրորդ ելք, որպեսզի երբևէ թակարդի էֆեկտ չստացվի, ինչպես այս ողբերգության ընթացքում ականատես եղանք»,- նշեց Վարդապետյանը և հավելեց, որ Դատախազությունը պարբերաբար հասարակությանը կտեղեկացնի կատարվող քննության, բոլոր ստուգվող վարկածների մասին, որպեսզի «չունենանք սև խոռոչներ, ասեկոսեներ և բամբասանքի մակարդակի փորձագիտական կարծիքներ»: