Կադրային փոփոխություններ ԱԺ-ում. Վահան Նարիբեկյանը ազատվել է ԱԺ աշխատակազմի ղեկավարի պաշտոնից

Վահան Նարիբեկյանն ազատվել է Ազգային ժողովի աշխատակազմի ղեկավարի պաշտոնից։ Այս մասին ասվում է ԱԺ նախագահ Ալեն Սիմոնյանի որոշման մեջ։

«Ղեկավարվելով «Հանրային ծառայության մասին» օրենքի 9-րդ հոդվածի 12-րդ մասով, Ազգային ժողովի խորհրդի 2017 թվականի հունիսի 12-ի «Հայաստանի Հանրապետության Ազգային ժողովի աշխատակազմի կառուցվածքը և կանոնադրությունը հաստատելու մասին» ԱԺԽՈ-006-Լ որոշման 1-ին հավելվածի 18-րդ կետի 1-ին ենթակետով և հիմք ընդունելով Վ. Նարիբեկյանի 2023 թվականի փետրվարի 3-ի դիմումը՝ կարգադրում եմ.

2023 թվականի փետրվարի 3-ից Ազգային ժողովի աշխատակազմի ղեկավար-գլխավոր քարտուղար Վահան ՆԱՐԻԲԵԿՅԱՆԻՆ ազատել զբաղեցրած պաշտոնից:
Ազգային ժողովի աշխատակազմի ֆինանսական կառավարման և հաշվառման վարչությանը՝ ապահովել Հայաստանի Հանրապետության օրենսդրությամբ սահմանված կարգով լրիվ վերջնահաշվարկի կատարումը»,- ասվում է որոշման մեջ:

Մեկ այլ որոշմամբ՝ ԱԺ նախագահի օգնական Դավիթ Առաքլյանն ազատվել է զբաղեցված պաշտոնից և նշանակվել ԱԺ աշխատակազմի ղեկավար-գլխավոր քարտուղար:

«Ղեկավարվելով «Հանրային ծառայության մասին» օրենքի 9-րդ հոդվածի 10-րդ եւ 12-րդ մասերով, Ազգային ժողովի խորհրդի 2017 թվականի հունիսի 12-ի ԱԺԽՈ-006-Լ որոշման 1-ին հավելվածի 18-րդ կետի 1-ին ենթակետով և հիմք ընդունելով Դավիթ Առաքելյանի 2023 թվականի փետրվարի 3-ի դիմումը` կարգադրում եմ.

2023 թվականի փետրվարի 3-ից ԴԱՎԻԹ ԱՌԱՔԵԼՅԱՆԻՆ ազատել Ազգային ժողովի նախագահի օգնականի պաշտոնից:

2023 թվականի փետրվարի 3-ից ԴԱՎԻԹ ԱՌԱՔԵԼՅԱՆԻՆ նշանակել Ազգային ժողովի աշխատակազմի ղեկավար-գլխավոր քարտուղար»,- նշվում է որոշման մեջ: