Ինչի՞ շուրջ է ծագել աղբահանության աշխատակիցների ու բնակիչների միջև վեճը. մանրամասներ` դանակահարության դեպքից

NEWSPRESS.am-ին հայտնի է դարձել, թե փետրվարի 2–ի գիշերն ինչու են դանակահարել Երևանի աղբահանության և սանիտարական մաքրում հիմնարկի երկու աշխատակցին։

Դեպքը տեղի է ունեցել Երևանի Ավան-Առինջի Տաշքենդի փողոցի 2/8 հասցեում։ Աղբահանության աշխատակիցների և տեղի բնակիչների միջև վեճը տեղի է ունեցել տեղադրված աղբամանների շուրջ։

Բնակիչներից մեկը դժգոհել է, թե իր պատուհանի դիմաց տեղադրված աղբամանները խանգարում են իրեն և դրանք պետք է հեռացնել։ Երկխոսությունը վերածվել է վիճաբանության, վիճաբանությունը` ծեծկռտուքի, որի հետևանքով դանակահարվել են աղբահանության աշխատակիցները։

Մեր տեղեկություններով՝ նման միջադեպեր հաճախ են եղել թե՛ նախկին, թե՛ այսօրվա տնօրինության օրոք։ Սակայն, եթե նախկինում, նման դեպքերի ժամանակ, աշխատակիցները հայտնում էին միջադեպի մասին տնօրինությանը ու տնօրենի անմիջական մասնակցությամբ իրավիճակը հարթվում էր, ապա այսօր պատկերը մի փոքր այլ է։

Մեզ հայտնի է դարձել, որ «Երևանի աղբահանություն և սանիտարական մաքրում» հիմնարկի տնօրեն Հովհաննես Մանուկյանը (ում «արկածներին» բազմիցս անդրադարձել ենք), իր աշխատակիցներին «դուխ» է տվել ու հորդորել նման դեպքում չզիջել` այդ կերպ փաստորեն, տնօրինության գործառույթը դնելով աշխատողների ուսին ու նրանց «գցելով կրակը»...

Արդյունքում այսօր վիրավորումներ ստացած աշխատակիցներից մեկը դեռ գտնվում է «Սուրբ Գրիգոր Լուսավորիչ» ԲԿ–ում: Նա հիվանդանոց է տեղափոխվել` ձախ կողքի կտրած-ծակած վնասումներ, մկանների պատռվածքով և վիրահատվել է։

Իսկ աղբատար մեքենայի վարորդն էլ ունեցել է ձախ արմունկային ոսկորի կոտրվածք։ Քաղաքացին, սակայն, հրաժարվել է հետագա հոսպիտալացումից։

Արմինե Մկրտումյան