Ստալինգրադի ճակատամարտի 80-ամյակն է. ՀՀ ԱԺ պատվիրակության հետ ՌԴ–ում հարցեր են քննարկվել

Մի շարք ոլորտներում հայ-ռուսական հարաբերությունների զարգացմանն առնչվող հարցեր է քննարկել ՀՀ ԱԺ խորհրդարանական պատվիրակությունը Վոլգոգրադի քաղաքային դումայի ղեկավար Ալեքսանդր Բլոշկինիու մարզի ղեկավար Անդրեյ Բոչարովի հետ։ Այս մասին տեղեկանում ենք ՀՀ ԱԺ կայքից։

Նշվում է, որ ԱԺ խորհրդարանական պատվիրակությունը Վոլգոգրադում մասնակցել է Ստալինգրադի ճակատամարտի 80-ամյակին նվիրված միջոցառումներին:
«Ընդգծվել է երկու երկրների միջտարածաշրջանային փոխգործակցության ընդլայնման անհրաժեշտությունը: Կարևորվել է այն հանգամանքը, որ այս ծանր ու բարդ ժամանակաշրջանում հայկական պաշտոնական պատվիրակությունն ու հայկական համայնքը ներկայացված են եղել բոլոր միջոցառումներին»,–ասված է հաղորդագրության մեջ։

Հավելենք, որ հայկական պատվիրակության կազմում են ԱԺ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի նախագահ Վահե Ղալումյանը, ԱԺ պատգամավորներ Ալեքսեյ Սանդիկովը և Մաթևոս Ասատրյանը։ Միջոցառումներին մասնակցում է նաև ՌԴ–ում Հայաստանի դեսպան Վաղարշակ Հարությունյանը:

Հիշեցնենք` Ստալինգրադի հաղթանակը բեկումնային է դարձել Հայրենական մեծ պատերազմի համար: Հայերը մեծ ավանդ են ունեցել այդ ճակատամարտում. արյունալի մարտերին մասնակցել է 30 000 հայ, որից 10 000-ը զոհվել է: Մասնակից հայերի կեսից ավելին պարգևատրվել է շքանշաններով և մեդալներով: Հայ ճարտարապետ Կարո Հալաբյանի ղեկավարմամբ իրականացվել է Վոլգոգրադի վերակառուցման նախագիծը: