Անկարան արտաքին քաղաքական նոր կողմնորոշում է որդեգրել. ԱՄՆ-ի վերլուծական կենտրոններից մեկը մանրամասներ է ներկայացրել

ԱՄՆ-ում գործող «Foreign Policy Research Institute» վերլուծական կենտրոնի պատրաստած զեկույցում ասվում է, որ Թուրքիան աճող տերություն է, և Անկարան արտաքին քաղաքական նոր կողմնորոշում է որդեգրել: Այս մասին տեղեկացնում է Akşam-ը։

Թուրքիայի վերաբերյալ նոր զեկույց է պատրաստվել, որն իր տարածաշրջանում իր խոսքն ունի և հանդես է գալիս որպես միջնորդ գլոբալ խնդիրների լուծման համար։ ԱՄՆ-ում գործող «Foreign Policy Research Institute» վերլուծական կենտրոնի պատրաստած զեկույցը ուշադրություն է հրավիրել Անկարայի արտաքին քաղաքականության նոր ճանապարհային քարտեզի վրա։ Սառը պատերազմի ավարտով և Ռեջեփ Թայիփ Էրդողանի «Արդարություն և զարգացում» կուսակցության վերելքով Թուրքիան պարզապես նոր արտաքին քաղաքական կողմնորոշում չի որդեգրել. այն է՝ Անկարան այլևս շահագրգռված է ոչ թե ստատուս-քվոյի պահպանմամբ, այլ՝ այն փոխակերպելով։

Աարոն Սթեյնի և Նիկոլաս Դանֆորտի կողմից գրված հոդվածում ասվում է, որ «Թուրքիայի արտաքին քաղաքականությունը սկսել է կենտրոնանալ տարածաշրջանային կարգի վերափոխման վրա՝ ազդեցություն ունենալու իր աճող ցանկությանը համապատասխան»։

«Foreign Policy»-ի զեկույցում նշվում էր, որ Թուրքիայի հարաբերությունները հարևան պետությունների հետ անցած տարիներին ձևավորվել են աշխարհաքաղաքական պայքարում նրա ունեցած դիրքով։

Ասվում է, որ այսօր այս իրավիճակը փոխվել է: Սառը պատերազմի ավարտը և Թուրքիայի տնտեսական, ռազմական և դիվանագիտական հզորության աճը փոխել են այս իրավիճակը: Թուրքիայի արտաքին քաղաքականությունը կենտրոնացած է տարածաշրջանային կարգի վերափոխման վրա՝ իր աճող ազդեցությանը համապատասխան:

Վերլուծության մեջ, որը նաև առաջարկվել է ամերիկացի քաղաքական գործիչներին, ներառվել է հետևյալ հայտարարությունը. «Արդյունքում ԱՄՆ քաղաքական գործիչների համար առավել քան երբևէ կարևոր է հասկանալ տարածաշրջանում Թուրքիայի դիրքորոշման պատմական հետագիծը»։