Հալեպում զոհվածների թվում են ազգությամբ 2 հայ. ԱԳՆ-ն հաստատում է

Այս պահի դրությամբ առկա ճշգրտված տեղեկատվության համաձայն՝ երկրաշարժի հետևանքով Սիրիայի Հալեպ քաղաքում զոհվածների թվում են ազգությամբ երկու հայեր, որոնցից մեկը երկքաղաքացի (Սիրիայի և Հայաստանի)։ Այս մասին հայտնում են ՀՀ ԱԳՆ խոսնակ Վահան Հունանյանը։

Աշխատանքներ են տարվում նաև Թուրքիայում տուժածների շրջանում ՀՀ քաղաքացիների առկայության մասին տեղեկատվություն ստանալու ուղղությամբ։

Ավելի վաղ հայտնել էինք, որ Սիրիայում երկրաշարժի զոհերի մեջ կան նաև հայեր:

Հիշեցնենք, որ Թուրքիայի Քահրամանմարաշ նահանգում ժամը 04։17-ին տեղի է ունեցել 7,4 մագնիտուդով երկրաշարժ, որի հետևանքով ավերածություններ են տեղի ունեցել մի շարք քաղաքներում։Թուրքական իշխանությունների տվյալներով՝ երկրաշարժն ուղեկցվել է 32 հետցնցումներով, որոնցից ամենաուժեղը եղել է 6,6 մագնիտուդով։

Թուրքական յոթ նահանգներում զոհերի թիվը, վերջին տվյալներով, հասել է 76-ի, ևս 440-ը տուժել են։ Ավելի վաղ փոխնախագահ Ֆուաթ Օքթայը հայտնել է, որ Թուրքիայում երկրաշարժի հետևանքով զոհվել է 284 մարդ, վիրավորվել՝ մոտ 2500-ը։
Ավերածություններ կան նաև Սիրիայի մի քանի շրջաններում։ Երկրաշարժը զգացվել է նաև Լիբանանի մայրաքաղաք Բեյրութում: