Ուկրաինան խորտակել է ռուսական հինգ նավ, որոնք տեղափոխում էին «հետախուզական» ու «դիվերսիոն» խմբեր

Փետրվարի 23-ին պատերազմի սկսվելուց ի վեր ուկրաինացի զինվորականների կողմից, ընդհանուր առմամբ, շարքից դուրս է բերվել 18 ռուսական ռազմանավ և այլ նավ: Այս մասին տեղեկացնում է The Jerusalem Post-ը։

«Ուկրաինայի զինված ուժերի գլխավոր շտաբը երեքշաբթի հայտարարել է, որ ուկրաինացի զինվորականները 24 ժամվա ընթացքում շարքից հանել են ռուսական առնվազն հինգ թեթև նավ, որոնք տեղափոխում էին «հետախուզական» և «դիվերսիոն» խմբեր։

Շարժիչային նավակները խորտակվել են Դնեպր գետի դելտայի կղզու շղթաներում, որտեղ այն թափվում է Սև ծով։ Նոյեմբերին ռուսական ուժերը նահանջեցին ռազմավարական գետի արևելյան ափ, որը բաժանում է Ուկրաինան և հոսում մի քանի խոշոր քաղաքով։

«Ուկրինֆորմ»-ը հայտնել է, որ Ռուսաստանը կղզիների տարածքում ակտիվացրել է «դիվերսիոն-հետախուզական» խմբերի գործողությունները։

Ռուսական նավերը՝ ուկրաինական ափերին

Նույն տարածքում՝ հունվարի 10-ին, ուկրաինական հրետանու կողմից խորտակվել է ռուսական ռազմանավ։ Թեև պարզ չէր, թե ինչ դասի է եղել նավը խորտակման պահին, հայտարարությանը կից ինֆրակարմիր լուսանկարը ցույց է տալիս, թե ինչու էր այրվում պարեկային նավը:

Հինգ մոտորանավերի խորտակման մասին հաղորդագրություններից հետո, Ուկրաինայի պաշտպանության նախարարությունը չի թարմացրել իր ուժերի կողմից ոչնչացված ռուսական նավերի տվյալները:

Ուկրաինական նավատորմի տվյալներով՝ երեքշաբթի օրը՝ Սև ծովում, մարտական գործողությունների համար պատրաստ վիճակում է գտնվել ռուսական 12 նավ։ Նավերից երեքը զինված են եղել «Կալիբր» «ծով-ցամաք» հրթիռներով, որոնք Սևծովյան նավատորմը պարբերաբար օգտագործում է ուկրաինական դիրքերը ռմբակոծելու համար:

Թեև Ուկրաինան սովորական նավատորմի առումով քիչ բան ունի այն բանից հետո, երբ դրա մեծ մասը ավերվեց կամ գրավվեց Ռուսաստանի կողմից 2014 թվականին Սևաստոպոլը գրավելու ժամանակ, այն հականավային հրթիռների և ռազմածովային անօդաչու թռչող սարքերի կիրառմամբ հակադարձել է Սև ծովում ծովային լիակատար գերազանցության ռուսական փորձերին:

Ռուսական նավատորմը զգուշանում էր ուկրաինական ափին մոտենալու հարցում և վերջին ամիսներին երբեմն զրոյի է հասցրել իր հրթիռային նավակների առկայությունը»,- գրում է հրեական պարբերականը: