Թեհրանում մեր դեսպանատան վրա հարձակման հետաքննությանը պետք է ապահովվի Ադրբեջանի մասնակցությունը. ադրբեջանցի դիվանագետ

Թեհրանում Ադրբեջանի դեսպանատան դեմ իրականացված հարձակման հետ կապված նոր տեսագրությունների ի հայտ գալը պետք է դրդի իրանական կողմին օբյեկտիվորեն հետաքննել միջադեպը։ Այս փաստերին Իրանի վերաբերմունքը փորձաքար կլինի Թեհրանի և Ադրբեջանի միջև դիվանագիտական և բարիդրացիական նորմալ հարաբերությունների վերականգնման գործում։ Ադրբեջանական AZERTAC-ին տված հարցազրույցում այս տեսակետն է հայտնել նախկին դեսպան, իրավագիտության դոկտոր, պրոֆեսոր Նամիխ Ալիևը։

«Երկուշաբթի օրը կայացած ճեպազրույցում Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն հայտնել է Իրանում մեր երկրի դեսպանատան վրա զինված հարձակման մանրամասները։ Նա ասել է, որ երբ Ադրբեջանի դեսպանատան մոտ տեղի է ունեցել ահաբեկչություն, իրանական ոստիկանական մեքենան մոտեցել է դիվանագիտական ներկայացուցչության շենքին, բայց հետո հեռացել։ Ներկայացվել են նաև համապատասխան տեսանյութեր»,- նշել է նա:

Դիվանագետը կարծում է, որ ադրբեջանական կողմի համար պետք է պայմաններ ստեղծվեն Իրանի հատուկ ծառայությունների կողմից իրականացվող հետաքննությանը մասնակցելու համար, և այդ հետաքննությունը պետք է լինի թափանցիկ և օբյեկտիվ։

«Մանրամասները ցույց են տալիս, որ ահաբեկչության հետևում կանգնած են այն ուժերը, որոնք նպատակ ունեն խաթարել Իրան-Ադրբեջան հարաբերությունները։ Իրանական կողմի ճիշտ գործողությունները չպետք է թույլ տան, որ ներկայիս իրավիճակը անդունդն ընկնի»,- ասել է դիվանագետը՝ հավելելով, որ մեկ այլ երկրում մի երկրի դեսպանատան գործունեության կասեցումն իրականում նշանակում է միջպետական հարաբերությունների խախտում։

Թեհրանում Ադրբեջանի դեսպանատան դեմ կատարված ահաբեկչությունը աննախադեպ իրադարձություն համարելով ադրբեջանական դիվանագիտության պատմության մեջ՝ Նամիխ Ալիևը հույս է հայտնել, որ իրանական կողմը կավելացնի իր ջանքերը՝ տարածաշրջանում կայունություն ապահովելու համար։