Նախագծով սպառողին զրկում ենք հնարավորությունից. Արթուր Խաչատրյան

«Արժութային կարգավորման և արժութային վերահսկողության մասին» օրենքում փոփոխություններ կատարելու մասին նախագծի քննարկման ժամանակ, նախագծի համահեղինակ ՔՊ-ական պատգամավոր Գևորգ Պապոյանը մանրամասնեց, որ  առաջարկվում է ֆինանսական կազմակերպություններին արգելել արտարժույթներով վարկեր տրամադրել:

Արձագանքելով նախագծի առաջարկին, «Հայաստան» խմբակցության պատգամավոր Արթուր Խաչատրյանն էլ նկատեց, որ ռիսկ կա:

«Այո, մենք չգիտենք, թե փոխարժեքն ու տոկոսադրույքը ի՞նչ կլինի, բայց բոլոր դեպքերում այդ ռիսկը ծածկվում է արտարժութային տոկոսային պարիտետով»,-ասաց նա:

Ընդդիմադիր պատգամավորի դիտարկմամբ,  քաղաքացին կանխատեսում և կարգավորում չի կարող անել, բայց բանկերն ինչ-որ կանխատեսումներով գալիս են այդ տոկոսադրույքային պարիտետին: Նա պատահական չի համարում նաև այն, որ արտարժույթով վարկերի տոկոսադրույքներն ավելի ցածր են, քան դրամով վարկերը:

«Արտարժույթի արժեքի տատանումների ռիսկը միշտ կա, բայց ենթադրվում է, որ բանկն այն կարղանում է կարգավորել՝ արտարժույթի ազատ փոխարկելիության միջոցով և երկրորդ՝ տոկոսադրույքային պարիտետի միջոցով:

Իմ կարծիքով՝ սրա նպատակն այն է, որ պետությունն ազատ դոլարը գնի, իսկ դոլարը կազատվի: Մենք համակարգում ունենք մեծ լիկվիդայնություն: Այդ ազատ դոլարը պետությունը գնելու է, որովհետևև այդ լիկվիդայնությունը պետք է ինչ-որ մի տեղից շուկա լցվի: Փոփոխությամբ պետությունը ցանկանում է սպասարկել արտաքին պարտքը:

Միգուց այն վատ բան չէ, քանի որ տնտեսության դոլարիզացիան իրոք ռիսկային է, բայց այս օրենքով երբ փորձում են ներկայացնել սպառողների շահերի պաշտպանությունը՝ ճիշտ չէ: Մենք, ընդհակառակը, սպառողին զրկում ենք հնարավորությունից՝ երբ համակարգն ունի գործիքներ որպեսզի այդ ռիսկերը չեզոքացնի»,-հայտարարեց Արթուր Խարատրյանը