Ողբերգական ավտովթար` Երևանում. Toyota-ն մի քանի պտույտ գլխիվայր շրջվել է. կա մեկ զոհ, մեկ վիրավոր

Ողբերգական ավտովթար է  տեղի ունեցել Երևանում։Ժամը 19։40-ի սահմաններում Toyota մակնիշի ավտոմեքենան Արարատի մարզից դեպի Երևան ընթանալիս` ժողովրդին հայտնի Նորագավիթի «գայի պոստի» մոտ դուրս է եկել երթևեկելի գոտուց, բախվել բետոնե պատնեշին, մի քանի պտույտ շրջվելով` գլխիվայր հայտնվել նախկին ՃՈ անշարժ պահակետի պատի մոտ։

Ինչպես հայտնում է shamshyan.com-ը, վթարի հետևանքով մեկ հոգի տեղում մահացել է, իսկ մեկ հոգի մարմնական վնասվածքներով տեղափոխվել է  Էրեբունի բժշկական կենտրոն։ 

Ժամանել է նաև Ոստիկանության Շենգավիթի բաժնի օպերատիվ խումբը` բաժնի պետ Կարեն Բունիաթյանի գլխավորությամբ։ Ֆոտոլրագրողը հայտնում է, որ իրավիճակը բավականին լարված էր, քանի որ մահացածի ընկերները կարծում էին, որ նա չի մահացել ու պահանջում էին, որ շտապօգնությունը նրան տեղափոխի հիվանդանոց։

Սակայն 4 անգամ ժամանած շտապօգնության բժիշկները տեղում արձանագրել են, որ նա մահացած է, սակայն դա նույնպես չէր հանգստացնում հավաքվածներին, ովքեր անընդհատ պնդում էին, որ նա ողջ է։ Իրավիճակը բավականին լարված էր, սակայն ոստիկանության Շենգավիթի բաժնի ծառայողներին, պարեկներին և օպերատիվորեն ժամանած Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի պետ Գոռ Թադևոսյանին, պետի տեղակալ Արթուր Ադամյանին, ՓԾ Երևանի գնդի հրամանատար Ա. Իսախանյանին հաջողվեց իրավիճակը վերցնել իրենց հսկողության տակ, ինչից հետո դի տեղափոխող բրիգադի աշխատակիցները կարողացան դին տեղափոխել։

Տեղում քննչական աշխատանքները ղեկավարել է քննիչ Նարեկ Պետրոսյանը, ում կողմից վթարի փաստով նախաձեռնվել է քրեական վարույթ։Քննիչի հանձնարարականով ավտոմեքենան, որը քաղաքացիներն ու պարեկները դարձի բերեցին, քարշակի միջոցով տեղափոխվեց Երևանի գնդի պահպանվող հատուկ տարածք։ Ոստիկանությունն ու քննչական բաժինը պարզում են վարորդի, մահացածի և վիրավորի ինքնությունը։