Լաչինի միջանցքի վերահսկողությունը պետք է սահմանեն ռուս խաղաղապահները, իսկ անվտանգությունն ապահովվի՝ Ադրբեջանի կողմից. ՔՊ-ական

«Երբ պատրաստ լինեն մեր առաջարկները, կուղարկվի Ադրբեջան»: Լրագրողների հետ ճեպազրույցում այս մասին ասաց ՔՊ պատգամավոր Սարգիս Խանդանյանը։

Անդրադառնալով ԵԱՀԿ Մինսկի խմբի ռուսաստանցի համանախագահ Իգոր Խովաևի այցին Հայաստան՝ Խանդանյանն ասաց, թե այցի շրջանակներում քննարկման թեման եղել է Լաչինի միջանցքի ապաշրջափակումը, սահմանային անվտանգության ապահովումը։

«ՀՀ կառավարության ներկայացուցիչները հենց այդ հարցերն են քննարկել ռուսաստանցի համանախագահի հետ, սա համանախագահի հերթական այցն էր Հայաստան, արդյունքներն ավելի մեծ պատկերի մեջ պետք է տեսնել»,- ընդգծեց արտաքին հարաբերությունների հանձնաժողովի նախագահը։

Նա նշեց, թե Լաչինի միջանցքը պետք է անխափան գործի։

«Լաչինի միջանցքի վերահսկողությունը պետք է սահմանի Ռուսաստանի խաղաղապահ ուժերը, իսկ անվտանգությունն ապահովվի Ադրբեջանի կողմից»,- հավելեց Խանդանյանը։

Լրագրողի հարցին, թե Արարատ Միրզոյան-Սերգեյ Լավրով հեռախոսազրույցի վերաբերյալ, հետաքրքրվեցի՞ն՝ արդյոք հայկական կողմը փորձում է ռուսական կողմին բացատրել, որ ԵՄ դիտորդական առաքելության տեղակայումն ուղղված չէ ՌԴ-ի դեմ, ՔՊ խմբակցության քարտուղար Արթուր Հովհաննիսյանը պատասխանեց, որ Հայաստանը որևէ մեկին բացատրելու կարիք չունի, որ որևէ մեկի դեմ չէ ուղղված ԵՄ քաղաքացիական դիտորդական առաքելությունը։

«Հայաստանն իր դիվանագիտական ջանքերի շնորհիվ կարողացել է պայմանավորվել ԵՄ գործընկերների հետ, որ առաքելությունը երկարացվի, սա բխում է բացառապես ՀՀ շահերից»,- ասաց նա։

ՔՊ-ականը վստահեցրեց՝ Հայաստանը շատ ակտիվ քաղաքականություն է վարում և Ռուսաստանի, և արևմտյան, և Իրանի գործընկերների հետ։