Եվրամիության դիտորդների մանդատի մասով իր համար դեռևս կան անհասկանալի իրավիճակներ. Աբրահամյան

Ես չեմ բացառում, որ որևէ փուլում եվրոպական քաղաքացիական առաքելությունը որպես շարունակցություն, կունենա նաև ռազմական կոմպոնենտ: Այս մասին Ազգային ժողովում ճեպազրույցի ժամանակ ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով եվրոպական քաղաքացիական դիտորդների՝ ռազմական ներկայության դրսևորմանը: 

Շարունակելով խոսքը` Աբրահամյանը նշեց. «Ինչ վերաբերում է այդ առաքելությանը, և ՌԴ-ի հետ հակասությունների ստեղծմանը, ապա այս իրավիճակում պետք է գնահատել հետևյալը. այն է՝ կա խորը դիմակայություն Արևմուտքի և Ռուսաստանի միջև: Եվ այստեղ խնդիրն այն չէ, թե որն է ավելի էֆեկտիվ դիմակայություն ապահովելու՝ Հայաստանի դեմ արշավին կամ հնարավոր ագրեսիային, այլ, խնդիրն այն է, որպեսզի Հայաստանն ու Հայաստանի յուրաքանչյուր իշխանություն՝ կլինեն սրանք, թե այլ իշխանություն, ուղղակի ամեն ինչ անեն՝ Արևմուտք-Ռուսաստան դիմակայության դաշտ չմտնելու համար: Մեր հիմնական խնդիրն այն է, որ գործընթացն ուղեկցվում է Ռուսաստան-Արևմուտք բավականին սուր և խորը դիմակայության պայմաններում, Հայաստանի իշխանությունների հայտարությունները շատ դեպքում կրակի վրա յուղ լցնելու գործառույթ են իրականացնում՝ անկախ այդ պահին նրանց ունեցած նպատակներից և թիրախներից: Եվ իրավիճակը եկել ու հասել է մի կետի, երբ հասարակական, քաղաքական, վերլուծական մեր հանրույթը թեման ոչ թե քննարկում է բուն առաքելության ու դրա նպատակների առանցքում, այլ այն, թե Արևմուտք-Ռուսաստան դիմակայությունն այս կամ հաջորդ փուլերում ինչ հիմնական խնդիրների կբերի»:

Աբրահամյանի խոսքով՝ կոնկրետ Եվրամիության դիտորդների մանդատի մասով իր համար դեռևս կան անհասկանալի իրավիճակներ: Իր համար դեռ պարզ չէ, թե ինչ լիազորություններով, ինչ տեխնիկական միջոցներով, ինչ ֆունկցիա է իրականացնելու, ուստի այս իրավիճակում բարդ է գնահատել դրա էֆեկտիվությունը: