Սիրիայի և Թուրքիայի ավերիչ երկրաշարժերի հետևանքով զոհվել է 13 հայ. հայտնի են անունները

Ցավոք սրտի, երկրաշարժի հետևանքով զոհեր ունենք ինչպես թուրքահայ համայնքում, այնպես էլ՝ սիրիահայ համայնքում: Սիրիայի և Թուրքիայի ավերիչ երկրաշարժերի հետևանքով զոհվել է 13 հայ: Այս մասին այսօր լրագրողների հետ զրույցում ասաց Սփյուռքի հանձնակատարի գրասենյակի ռազմավարությունների մշակման բաժնի պետ Հովհաննես Ալեքսանյանը:

«Քանի որ առաջին օրերին տեղեկատվությունը տարբեր խողովակներով էր տեղ հասնում և դժվար էր ճշգրիտ տեղեկություններ հաղորդելը, սխալվելու հավանականություն կար, սակայն արդեն՝ մեկ շաբաթ անց մենք կարող ենք նշել,

Հալեպում ունենք 2 զոհ (Միրնա Թեքեճյան և որդին՝ Ալպեր Թեքեճյան),

Թուրքիայում (Մալաթիա), ունենք 4 զոհ (՝ Սամիթ Թաբաշ, Աիդա Թաբաշ, Ալեքս Թաբաշ, Մարիամ Քարաթաշ), 

Իսքենդերունում ունենք մեկ զոհված ընտանիք (Դշխուն Մեսրոպյան, Արմիկ Մեսրոպյան, Մեսրոպ Մեսրոպյան, Պայծառ Սիլահլի)

Անտիոքում զոհվել է Անտուան Հորոսը,

Տիգրանակերտում՝ երգչուհի Զիլան Տիգրիսը, նա արդեն հուղարկավորվել է և Ադըյամանում զոհվել է Յոհաննա-Կարոլինա Կապը, որն էքսկուրսավար էր:

Հալեպում պաշտոնական զոհերի թիվը դեռ երկուսն է։ Զոհվել են Միրնա Թեքեճյան և որդին՝ Ալպեր Թեքեճյանը»,- նշեց Ալեքսանյանը: 

Ալեքսանյանի խոսքով՝ ունենք նաև վիրավորներ, որոնք մի մասը բուժում է ստանում, իսկ մի մասն էլ թեթև վնասվածքներ է ստացել: 

«Անշուշտ հայկական հաստատությունները, այդ թվում՝ եկեղեցիներ, կրթական հաստատությունները, համայնքային հաստատությունները, զգլի տուժել են հատկապես Սիրիայի տարածքում: Այս պահին ճշտվում է ավերածությունների չափն ու շինությունների վնասված լինելը, ինչպես նաև դրանց հետագա օգտագործելիությունը հասկանալու համար»,- նշեց նա: