Կապիտանը սուրճի բաժակի չափով է բենզին լցրել փայտի վրա․ փաստաբանն ուշագրավ մանրամասներ է ներկայացրել ցուցմունքից (տեսանյութ)
Ազատ գյուղի զինվորական կացարանում բռնկված հրդեհի հետևանքով զոհված15 զինվորի մահվան գործով մեղադրյալ, կապիտան Եղիշե Հակոբյանի թմրաբանական փորձաքննության հետազոտության եզրակացությամբ նրա արյան մեջ թմրանյութ չի հայտնաբերվել։ Այս մասին NEWS.am-ի հետ զրույցում ասաց նրա փաստաբան Հովսեփ Սարգսյանը։
«Հետևաբար այն տարածված կարծիքը, թե Եղիշե Հակոբյանը օգտագործել է թմրամիջոց, իրականության հետ աղերս չունի»,– ասաց Հովսեփ Սարգսյանը։
Կապիտան Եղիշե Հակոբյանը, որը հրդեհի պաշտոնական վարկածով գլխավոր գործող անձն է, հրդեհից գրեթե մեկ ամիս անց՝ նախօրեին՝ Այրվածքանաբանության ազգային կենտրոնում ցուցմունք է տվել։
«Եղիշե Հակոբյանն իր ցուցմունքում նշել է, որ ինքը վառարանը վառելու համար ոչ թե կացարանից, այլ մոտիկ տեղից պլաստմասե ամանով բենզին է բերել, որովհետև այլ նյութեր չեն եղել վառելու համար, ունեցել են փայտանյութ, որը եղել է թաց։ Տարան կիսով չափ է լցված եղել կամ մի քիչ շատ, բայց ոչ հինգ լիտր։ Վառարանը, որն ունեցել է երկու մուտք, մեկը վերևի հատվածում կլոր տեսքով, մյուսը՝ դռան հատվածում, որտեղից փայտ են լցնում։ Եղիշեն պատմել է, որ սուրճի բաժակի չափով բենզին է լցրել փայտի վրա, որ փայտը կպնի, որ չորանա, համ էլ կպնի, որովհետև թաց է եղել փայտը, բայց չի կպել, այսինքն՝ բենզին լցնելուց հետո կրակ չի եղել։
Եղիշեն ասել է, որ սպասել է մի տասը վայրկյան, այդ ընթացքում բենզինով տարան ձեռքն է եղել։ Եղիշեն պատմել է, որ վառարանը ծխում էր։ Նա պատմել է, որ երբ առաջ է եկել, կռացել դեպի էդ հատվածը, որտեղ վառարանի կլոր հատվածն է, այսինքն՝ մյուս մուտքը, որ տեսնի, թե ինչ է կատարվում, բոցը տվել է դեմքին։ Եղիշեն ենթադրում է, որ բոցը նաև վառարանի դռնակից է դուրս եկել, որովհետև իր ձեռքերը նույնպես այրվել են։ Ըստ կապիտանի՝ ինքը կանեստրը դրել է գետնին ու փորձել կրակը մարել, բայց կրակն անցել է պլաստմասե տարայի մեջ։ Եղիշեն պատմել է, որ նույն պահին վերցրել ու դուրս է շպրտել տարան։ Հավանաբար այդ ընթացքում շատ քիչ քանակությամբ բենզին է լցվել մուտքի դռան վրա ու նաև դուռն է կպել»,– ցուցմունքից մանրամասներ ներկայացրեց փաստաբանը։
Եղիշե Հակոբյանի ցուցմունքի համաձայն՝ այդ ժամանակ նույն սենյակում է եղել նաև ժամկետային զինծառայող Լյովա Խառատյանը, ում հետ կապիտանը փորձել է մարել կրակը։
Մանրամասները՝ տեսանյութում:
