«Սա ի՞նչ կուռաժիտ է». Փաշինյանի ավտոշարասյան կողմից հղի կնոջը վրաերթի ենթարկելու գործով նիստին իրավիճակը լարվեց

Նիկոլ Փաշինյանի ավտոշարասյան կողմից հղի կնոջը վրաերթի ենթարկելու գործով մեղադրյալ Արամ Նավասարդյանի եղբայրը պնդում է, թե նա չէր կարող ավտոճանապարհի մեջտեղում կանգնեցնել ավտոմեքենան, ճանապարհ է տվել, որ ավտոշարասյունն անցնի։ Այս մասին Նավասարդյանի եղբայրը հայտարարել է դատական նիստի ընթացքում։

«Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանում՝ դատավոր Կարեն Ֆարխոյանի նախագահությամբ, այսօր կայացել է Նիկոլ Փաշինյանի ավտոշարասյան կողմից հղի կնոջ՝ Սոնա Մնացականյանին մահվան ելքով վրաերթի ենթարկելու գործով դատական նիստը։

Այսօր հարցաքննվեց ամբաստանյալ Արամ Նավասարդյանի եղբայրը, որը նույնպես ոստիկանության ծառայող է։ Վերջինս պատմեց, որ դեպքի օրը ծառայություն էր իրականացնում Արմաշ գյուղի հատվածում, քանի որ ընդդիմադիր ներկայացուցիչներ, այդ թվում՝ պատգամավորներ, Տիգրանաշեն գյուղից ոտքով իջնում էին դեպի Արմաշ, տեղեկություններ կային, որ կարող է քաղաքացիներն իրենց ընդդիմանային և ինքը կազմակերպել է, որ այդ խանգարելը չլինի։

Նա պատմեց, որ այդտեղ ծառայության էր, երբ եղբայրը զանգեց՝ հայտնելով դեպքի մասին։ Կոնկրետ ժամը վկան չհստակեցրեց՝ նշելով, որ նախաքննության ընթացքում հայտնել էր, քանի որ հեռախոսում այդ ժամանակ դեռևս պահպանված էր, այժմ հստակ ասել չի կարող։ Դեպքի մասին իմանալուց հետո զեկուցել է Արտաշատի ոստիկանությունում վարչության պետին, ապա՝ մեքենայով տեղափոխվել Երևան։

«Ասեցի՝ ես գամ դեպքի վայր, ասաց՝ ոչ, ես արդեն դեպքի վայրում եմ, «Նաիրի» ԲԿ եմ բարձրանում, երեխուն բերում են այդտեղ»,-ասաց վկան՝ պատմելով, որ եղբորն առաջարկել էր զանգել իրեն ծանոթ բժշկին, սակայն ի պատասխան ամբաստանյալն ասել էր, որ արդեն զանգել է։

Գործով շահագրգիռ վկա-ոստիկանը՝ ամբաստանյալի եղբայրը, վստահեցրեց, թե դեպքից անմիջապես հետո ամեն ինչ կազմակերպվել է՝ ավելացնելով, որ ոչ միայն իր եղբայրն է այդ մասին ասել, այլև՝ ՃՈ մյուս աշխատակիցները։

«Կանգնել է, շտապօգնություն է եկել։ Իրենք համ կանչել են, համ էլ՝ պատահական անցնող շտապօգնության մեքենա է եղել, երկու րոպե է տևել, միանգամից տեղափոխել են Նաիրի ԲԿ»,- ասաց վկան, ինչին արձագանքելով տուժողի իրավահաջորդի ներկայացուցիչ, փաստաբան Րաֆֆի Ասլանյանը նշեց, որ քրեական գործի տվյալներով՝ ոչ թե երկու րոպե է տևել, այլ՝ ավելի։

Ասլանյանի հարցին, թե ինչ տեղեկություններ ունի վրաերթից հետո եղբոր գործողություններից՝ վկան պատասխանեց. «Գիտեմ, որ բարձրացրել է վերև, որտեղ հնարավոր է եղել մեքենան կանգնացնելու, քանի որ ինքը նաև տեղ է տվել իր հետևից անցնող շարասյանը, չէր կարող շոշի մեջտեղում կանգներ, կանգնեցրել է, շարժվել այն ժամանակ, երբ բոլորը գնացել են, ապա շտապօգնությունը եկել է եւ շտապօգնության մեքենայի հետևից շարժվել է դեպի ԲԿ։ Քանի որ լարված իրավիճակ էր ու շատ լավ գիտենք, թե ինչ ժամանակներ էր, ինքը որոշում է կայացրել իջնել, համազգեստը փոխել և դեպքի վայր գնալ»։ Ասլանյանն արձանագրեց վկայի ցուցմունքի հակասությունը՝ գործում առկա տվյալների հետ՝ նշելով, որ գործում առկա տեսագրության տվյալների՝ ավտոմեքենան կանգնում է, հետո շարժվում է և այդ պահին դեռևս շտապօգնության մեքենա չի անցել, մինչդեռ, վկան հակառակն է ասում։

Նախագահող դատավոր Կարեն Ֆարխոյանը հետաքրքրվեց՝ արդյո՞ք տուժող կողմին վնասի հատուցում տրամադրվել է, ինչին ի պատասխան ամբաստանյալի եղբայրը նշեց, որ բազմիցս մոտեցում են ցուցաբերել, սակայն տուժող կողմը հրաժարվել է ընդհանրապես զրուցել։

«Ես ներկա եմ եղե՛լ և՛ հոգեհանգստի, և՛ հուղարկավորության արարողությանը՝ կարճ ժամանակով, դրանից հետո մոտեցել եմ, բայց բժիշկը՝ Մնացականյանը, չի ցանկացել»,- նշեց նա՝ հավելելով, որ մեղադրյալը չի մասնակցել արարողությանը։

Տուժող Սոնա Մնացականյանի իրավահաջորդը՝ հայրը, հայտարարությամբ հանդես եկավ. «Ախր ես չեմ հասկանում էլի։ Գնացել եմ տուն ու ինձ չեմ ներում։ Դուք հիշու՞մ եք ինչ էր ասում տեսուչը, թե ժողովուրդը լարված էր, ուզում էր ինձ մոտենալ, ռիսկ չարեց ու «կուռաժիտ» անելով։ Այս մարդկանց մեջ բարոյականությու՞ն չկա։ Այսպես ինքնավստահ գալիս գնում են, ինձ կբացատրե՞ք՝ այդ ինքնավստահությունը, շարժուձևը. «կուռաժիտ» լինելը։ Երիտասարդ կին է մահացել՝ 31 շաբաթական հղիությամբ»։

Հիշեցնենք, որ 2022թ. ապրիլի 26-ին՝ ժամը 18.05-ի սահմաններում, Լեո-Պարոնյան-Պռոշյան փողոցների հատվածում Նիկոլ Փաշինյանի կառավարական ավտոշարասյան մեքենաներից մեկը վրաերթի է ենթարկել 28 տարեկան երիտասարդ հղի կնոջ՝ Սոնա Մնացականյանին, որը տեղափոխվել էր «Նաիրի» հիվանդանոց, որտեղ գիտակցության չգալով՝ մահացել է։ Չի հաջողվել փրկել նաեւ պտղի կյանքը։