Ադրբեջանցիները փորձել են արգելափակել ֆիլմաշարի ցուցադրումը. «Հրապարակ»

«Հրապարակ» թերթը գրում է.

«Երեկ Կինոյի տանը տեղի ունեցավ ռեժիսոր Վագա Վարդանյանի՝ «Համար մեկ տանկիստը» փաստավավերագրական ֆիլմի պրեմիերան, որը նկարահանվել է ռուսաստանաբնակ գործարար, բարերար Արթուր Սողոմոնյանի ֆինանսական աջակցությամբ ու հինգ մասից բաղկացած ֆիլմաշարից մեկն է: Ֆիլմի հիմքում ՍՍՀՄ զրահատանկային զորքերի մարշալ, տաղանդավոր հայազգի ստրատեգ, զորահրամանատար Համազասպ Բաբաջանյանի կյանքն ու գործունեությունն են: Հատկանշական է, որ մարշալներ Բաղրամյանի, Խամփերյանցի, Բաբաջանյանի, Իսակովի, հայաստանցի Շյոլկինի մասին պատմող ֆիլմաշարերի ցուցադրությունները Հայաստանից դուրս ոչ միշտ են ընթացել հարթ. հետխորհրդային տարածքի այն քաղաքներում, որտեղ ուժեղ է եղել ադրբեջանական համայնքի ազդեցությունը, դրանց ցուցադրության կազմակերպումը հանդիպել է որոշակի խոչընդոտների:

Մեզ հետ զրույցում Արթուր Սողոմոնյանը նշեց, որ չի ցանկանում խոսել խոչընդոտներից՝ ավելացնելով, որ հայկական ազդեցիկ համայնք կա ամենուր, և հայերի համար խնդիրներ ստեղծելը հեշտ գործ չէ։ Ապա հավելեց, որ անչափ կարեւորում է հայ զորահրամանատարների մասին ժամանակակից ֆիլմերի ստեղծումը: Սողոմոնյանն ասաց, որ դրանց նպատակը եկող սերնդին ճիշտ, հայրենասիրական ոգով դաստիարակելն է, որպեսզի հանկարծ սերունդները չմոռանան իրենց հզոր նախնիներին, ինչը լավ ապագա ստեղծելու հիմնաքարերից է: Միջոցառման կազմակերպիչները մեզ փոխանցեցին նաեւ, որ ֆիլմը կցուցադրվի հայկական հեռուստաընկերություններից մեկով, ու հազարավոր մարդիկ հնարավորություն կունենան դիտելու այն:

Ի դեպ՝ Մոսկվայի հայ համայնքի ներկայացուցիչներից մեկը տեղեկացրեց, որ ադրբեջանցի մեծահարուստներին հանգիստ չի տալիս փաստը, որ իրենք չունեն հայերիս մասշտաբի զորահրամանատարներ, ու փորձել են ստեղծել ֆիլմ ԽՍՀՄ ինժեներական զորքերի մարշալ Սերգեյ Ագանովի մասին, սակայն հանդիպել են պատմաբանների լուրջ դիմադրությանը, ովքեր նշել են, որ այդ մարդը կապ չունի իրենց հետ ու, ամենայն հավանականությամբ, ազգությամբ հայ է` արցախյան արմատներով, իսկ հայկական անուն-ազգանունն է՝ Սերգեյ Օհանյան»: