Պարտված իշխանությունը չի կարող ներկայացնել այդ պետության շահը, պարտված իշխանությունների հետ հաշվի չեն նստում․ Ռուբեն Մելքոնյան

Ի թիվս այլ խայտառակությունների, այլ հետընթացների, մենք ևս մեկ անգամ արձանագրեցինք, որ այն, ինչ դոմինանտ էր մեր հասարակության գիտակից հատվածում և բխում էր պատմագիտության ակունքներից, տրամաբանությունից զուրկ է: Այս մասին լրագրողների հետ զրույցում ասաց թուրքագետ Ռուբեն Մելքոնյանը՝ անդրադառնալով Փաշինյանի՝ Մյունխենյան հանդիպումներին:

Նրա խոսքով՝ պարտված իշխանությունը չի կարող ներկայացնել այդ պետության շահը: Պարտված իշխանությունը խոցելի է երկրից դուրս և դա ևս մեկ անգամ վերահաստատվեց:

«Ալիևի այն հայտարարությունը, որ Հայաստանի ժողովուրդը կամ հայ ժողովուրդը համակերպվել է պարտության հետ և որպես ապացույց բերում էր 2021թ.-ի ընտրությունները, դա, ըստ էության, այն էր, ինչ կանխատեսում էինք մենք շատերս: Որ գալու է այդ օրը, որ ջայլամային քաղաքականությունից, եթե մի պահ գլուխները բարձրացնեն իշխանությունները, կտեսնեն, որ 2021-ին իրենք հաղթել են, իսկ Հայաստանը պարտվել է: Եվ այդ պարտությունը Հայաստանին ուղեկցելու է այնքան ժամանակ, քանի դեռ իրենք կան: Որովհետև իրենք իրոք չեն կարող Հայաստանը ներկայացնել, եթե անգամ մեծ ցանկություն էլ ունենան: Տրամաբանությունը ցույց է տալիս, որ պարտված իշխանությունների հետ հաշվի չեն նստում կամ նստում են այնքանով, որքանով մենք հիմա ենք տեսնում»,- նշեց Մելքոնյանը: 

Թուրքագետի խոսքով՝ այս իշխանության ցանկացած հանդիպում և քայլ Հայաստանի և Արցախի իրական շահերից հետընթաց է և հայկական պետականություններին այլ կարգավիճակ տեղափոխելու գործընթաց է, որովհետև մենք հիմա փաստորեն միջազգային հարթակներում խոսում ենք ոչ թե Արցախի ինքնորոշումից, անկախությունից, այլ ինչպես Ալիևն է ձևակերպում՝ հայ բնակչության անվտանգության խնդիրներից և այլն: