Ռուբեն Վարդանյանը՝ ոսկոր արցախցի պաշտոնյաների կոկորդում․ Դավիթ Բաբայանն ընդունել է Ալիևի «պասը»

Արցախի Հանրապետության նախագահի խորհրդական, նախկին արտգործնախարար Դավիթ Բաբայանը որոշել է հետ չմնալ ամեն գնով Ռուբեն Վարդանյանից ազատվել ցանկացողներից։ Վերջինս ոսկոր է դարձել ինչպես Ադրբեջանի և Հայաստանի, այնպես էլ Արցախի ղեկավարության կոկորդում։ 

«Պատրաստ ենք բանակցել հայ համայնքի այն ներկայացուցիչների հետ, որոնք ապրել են, ծնվել ու ողջ կյանքն ապրել են Ղարաբաղում։ Եվ ոչ այն մարդու հետ, որն արտահանվել է Ռուսաստանից՝ Ղարաբաղում ղեկավար պաշտոն զբաղեցնելու համար»,- ասել էր Ալիևը՝ Մյունխենում։ 

Խոսքն, իհարկե, նույն Ռուբեն Վարդանյանի մասին է, որի պաշտոնանկությունը սպասվում է առաջիկա ժամերին։ 

Դավիթ Բաբայանն էլ, Սամվել Բաբայանի պես, հավանաբար, ինքնաառաջադրվում է պետնախարարի պաշտոնում կամ առնվազն շողոքորթում նախագահ Արայիկ Հարությունյանին, որը վաղուց արդեն ոչ թե գործոն, այլ գործիք է փաշինյանա-ալիևյան տանդեմի ձեռքում։  

«Ղարաբաղը ներկայացնելու համար պետք է իմանալ, զգալ, այստեղ ունենալ ընկերներ, արմատներ, գերեզմաններ, թափել եթե ոչ արյուն, ապա քրտինք։ Միաժամանակ պետք է լավ ճանաչել Ադրբեջանը»,- մեկնաբանելով Ալիևին՝ ըստ էության նրան կրկնել է Դավիթ Բաբայանը՝ ևս նկատի ունենալով Ռուբեն Վարդանյանին։ Դեռ մի բան էլ սրտնեղել է, թե Բաքվում ինչո՞ւ են կարծում, որ միայն Ռուբեն Վարդանյանն է, որ չի տեսնում Արցախն Ադրբեջանի կազմում։ 

Լավ է անում Արայիկի խորհրդականը դարձած անձը, երբ ասում է, թե Արցախը պետք է ներկայացնի մեկը, ով այնտեղ ընկերներ ունի, արմատներ, գերեզմաններ ունի, թափել է եթե ոչ արյուն, ապա քրտինք։ 

Բայց 2020 թվականի մայիսի 26-ին, երբ Հայաստանում վարչապետ էր արդեն Արցախի դեմ քանիցս սադրիչ հայտարարություններ արած Նիկոլ Փաշինյանը, դիվանագետ մարդը չէր ընկալել, որ Արցախի հանձնման գործընթաց է սկսում ու համաձայնում էր նշանակվել Արցախի նախագահի արտաքին հարցերով խորհրդական։ 

Երբ Փաշինյան Նիկոլը գնում ու վերելակներում հանդիպում Ալիև Իլհամի հետ ու սկիզբ էր դնում Արցախի հանձնմանը, ինչո՞ւ Բաբայան Դավիթը չէր ասում՝ պարոն Նիկոլ, դու չե՛ս կարող ներկայացնել Արցախը, դու այստեղ ընկերներ չունես, արմատներ չունես, գերեզման չունես, առավել ևս ոչ էլ արյուն-քրտինք ես թափել այստեղ։ Դու այստեղ եկել ես միայն քո որդուն տեսնելու, եկել ես ուղղաթիռով կամ էլ տասնյակ մեքենաներով՝ որպես շրջագայություն, ոչ որպես հայրենիք։ 

Երբ Փաշինյան Նիկոլը ստորագրում էր Արցախի կապիտուլյացիան, ո՞ւր էին Դավիթ Բաբայանն ու մյուսներն առհասարակ։ Ինչպե՞ս եղավ, որ թույլ տվեցին իրենց հայրենիքն աճուրդի հանվի։ Հիմա բոլոր բլբուլ են կտրել։ Բլոկադայի պայմաններում Բաբայան Դավիթի համարձակությունը չներեց բողոքի ակցիա կազմակերպել ոչ թե ՄԱԿ-ի գրասենյակի, այլ, ասենք, ՀՀ կառավարության առջև։ Դե կարող էր մի կերպ իրենով արված աթոռից ընկնել, ինչպե՞ս կլիներ։ 

Իսկ Ռուբեն Վարդանյանի մասին կարելի է ասել բաներ, որոնք նույնությամբ Ալիևն է ասում։ Այսինքն՝ ստացվում է, որ Բաբայանի ու Ալիևի շահերը համընկնում են։

Ներարցախյան ինտրիգների ֆոնին, Արմեն Աշոտյանը հրապարակել է փաստաթուղթ՝ հայկական Արցախի դագաղի վերջին մեխը խփելու մասին, որը հնարավոր չնչին փոփոխություններով պատրաստվում է ստորագրել Արցախում ընկեր ու գերեզման չունեցող, արմատ չունեցող, Արցախում արյուն-քրտինք չթափած Նիկոլ Փաշինյանը և ընդհանրապես Արցախի վրա 1994-ից դեռևս վերևից թքած ունեցող Նիկոլ Փաշինյանը։

Մնացածը լիրիկա է։ Խաբեություն։ Մտքի ամլության և քաղաքական անկարողության ազդակոչ։ 

NEWSPRESS.am