Ոստիկանությունը պատուհաններն է ջարդում, որ ասեն՝ շենքը լքված է․ ՊՆ նախկին շենքի բնակիչները շարունակելու են նստացույցը

Այս պահին ոստիկանությունը գործողություն է իրականացնում՝ պատուհաններն են ջարդում, որ վաղն ասեն՝ շենքը լքված է։ Այս մասին ՊԵԿ-ի դիմաց ասաց ՊՆ նախկին շենքի բնակիչներից մեկը։

Նրա խոսքով՝ իրենք եկել են այստեղ` ՊԵԿ-ից մի քանի հարցի պատասխաններ ստանալու։ 

«Թող ՊԵԿ-ի ներկայացուցիչ դուրս գա՝ ցանկալի կլինի այն մարդը, որ եկել է մեր տուն, ոստիկանության աշխատակցի հետ, ով եկել, ասել է՝ ոտքս խերով, ասել է՝ եթե այս շենքը վթարային չլինի, ես այստեղ չեմ գա տարհանման գործընթացին մասնակցեմ, եթե լինի էլ այդպիսի որոշում, ես դուրս կգամ աշխատանքից։ Թող այդ մարդը գա, իրեն ասել են՝ շենքը երրորդ կարգի վթարային է, թող բերի այդ թուղթը մեզ ցույց տա, մի հատ էլ մենք հասկանանք՝ թուղթն իրենից ինչ է ներկայացնում։ Հասկացանք, որ մի քանի կառույցներ են, բայց վթարային է, հո աղետի գոտի չի, չնայած վերածվել է աղետի գոտու, երբ 20 ընտանիք հանում են փողոց, վերածվում է աղետի գոտու»,- ասաց շենքից տարհանված բնակիչը։ 

Նա նշեց, որ ոստիկանությունից իրենց ասել են, որ Կառավարության հիման վրա, ՊԵԿ-ի բողոքով են իրենց տարհանում։

«Մենք ծանոթ չենք ՊԵԿ-ի բողոքին ու պիտի հասկանանք, թե ինչու հենց փետրվարի 16-ին։ Շենքի հետ կապված ոչ մի տենդեր հայտարարված չէ։ Ոչ մի ժամանակավոր լուծման հետ մենք համաձայն չենք լինելու, նստտացույցն անժամկետ հայտարարվել է։ Մեր հարցերը, մեր պահանջը պետք է ստանա հիմնական լուծում»,- եզրափակեց ՊՆ նախկին շենքի բնակիչը։