Այդ 200 դեպքը որտեղի՞ց է եկել․ ուղղակի հաշվա՞րկ է, թե՞ իրականում լուրջ հետազոտության արդյունքում սկսում ենք առնվազն 200 դեպքը գոնե լուծել. Կյուրեղյան (տեսանյութ)

Ազգային ժողովում քննարկվում է «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքում լրացումներ կատարելու մասին նախագիծը:

Այն առաջարկում է օրենսդրական կարգավորում՝ միտված ընտանիքում բռնության ենթարկված անձանց պաշտպանության առավել արդյունավետ գործիքակազմ ունենալուն:

Իսկ ավելի կոնկրետ՝ 560 միլիոն դրամով ձեռք է բերվելու 200 էլեկտրոնային շղթայի հավաքածու՝ բռնարարին զոհից հեռու պահելու համար այն նրա ոտքին կամ ձեռքին ամրացնելու նպատակով:

Քննարկման ժամանակ «Հայաստան» խմբակցության պատգամավոր Արմենուհի Կյուրեղյանը հարցադրում ուղղեց Մարդու իրավունքների պաշտպանության և հանրային հարցերի մշտական հանձնաժողովի անդամ Մարինա Ղազարյանին:

«Արդարադատության փոխնախարարն իր ելույթում նշեց, թե որպես հիմք վերցրել են այն փաստը, որ 200 դեպքի համար անհրաժեշտ է 500 միլիոն և ավելի ծախս։ Ուզում եմ հասկանալ՝ այդ 200 դեպքը որտեղի՞ց է եկել, ուղղակի հաշվարկ է 200-ի համա՞ր և ծախսվում է այսքան գումար, թե՞ իրականում լուրջ հետազոտությունների արդյունքում մենք սկսում ենք առնվազն 200 դեպքերը գոնե լուծել»,- հարցրեց ընդդիմադիր պատգամավորը: 

Վերջինս նշեց, որ ընդդիմադիր պատգամավորն ուշադիր չի եղել, ասվել է՝ ուսումնասիրվել են այդ հարցերը, տարբեր երկրների՝ Կանադա, Ֆրանսիա, Իսպանիա, փորձն է հետազոտվել։

«Մենք գիտենք, որ մեզ մոտ էլ վիճակն այդքան նորմալ չէ։ Խոսքս բռնության հետ կապված խնդիրների մասին է։ Միշտ չէ, որ բարձրաձայնում են։ Այդ 200 դեպքը, եթե արդեն կա, նշանակում է՝ մենք ունենք խնդիր։ Թեկուզ մեկ մարդու նկատմամբ, եթե բռնություն է իրականացվում, մենք պարտավոր ենք այնպիսի միջավայր ստեղծենք, որ բռնությունը կանխարգելվի»,- ասաց ՔՊ-ական պատգամավորը։

Կյուրեղյանը կրկին հետաքրքրվեց՝ որտեղի՞ց այդ 200 թիվը. «Ֆրանսիայի, Կանադայի փորձի ուսումնասիրությունից դուրս բերել 200 թիվ, աբսուրդ է։ Ուզում եմ հասկանալ՝ 200 թիվ եք նշում, որտեղի՞ց է ծնվել 200-ը»,- ասաց նա:

Մարինա Ղազարյանն արձագանքեց. «Կներեք էլի, Դուք այնպիսի հարց եք տալիս, որ դա հասնում է աբսուրդի։ Պարզ է, որ ես չեմ իրականացրել այդ փորձագիտական ուսումնասիրությունը։ Այդ թիվը ես չեմ տվել։ Ինչպես և դուք, այնպես էլ ես, կառավարության ներկայացուցիչները ներկայացրել են, ուսումնասիրել են մարդիկ, և վեր են հանել այդ թիվը։ Ես չեմ հանել, հասկանում եք»։