ՀՀ իշխանությունները բառ առ բառ փոխանցում են ԼՂ-ի իշխանություններին, թե ինչ են բանակցում. Մարիա Կարապետյան

Ինչ-որ դիտակյունից պատմականորեն այդ խնդիրը կա: Կարծում եմ` կհամաձայնեք, որ 94 թվականից ի վեր եղել են փուլեր, երբ տարբերություններ են եղել դիրքորոշումների: Այս մասին Ազգային ժողովում ասաց «Քաղաքացիական պայմանագիր» խմբակցության պատգամավոր Մարիա Կարապետյանը՝ պատասխանելով այն հարցին, թե Արցախի և Հայաստանի տեսակետները երբ կարող են սինխրոնացվել, քանի որ Արցախն Արցախի հարցի լուծման այլ տեսակետ ունի, իսկ Հայաստանը՝ այլ: 

Նրա խոսքով՝ դիրքորոշումների տարբերություններ եղել են և կան Հայաստանում ևս: Հետևաբար, մնալով այն փիլիսոփայության մեջ, որ մենք սեպ չպետք է խրենք, չփորձենք ավելի տարբեր ներկայացնել այդ դիրքորոշումները, քան դրանք իրականում կան:

«Սա ես ասում եմ այն համատեքստում, որ Հայաստանի ներսում էլ կան Լեռնային Ղարաբաղի հիմնախնդրի վերաբերյալ տարբեր դիրքորոշումներ»,- ՔՊ-ականը:

Լրագրողների դիտարկմանը, թե Հայաստանն է ներկայացնում Արցախի շահերը, Կարապետյանը նշեց. «Խնդիրն առաջացել է այդտեղից: Այսինքն՝ դիրքորոշման ծագումնաբանությունը: Դա այն պահից, երբ Լեռնային Ղարաբաղը բանակցությունների սեղանից դուրս է մղվել: Ուստի քննադատության հարցում պետք է հետ գնալ և ֆիքսել, թե այդ որ պահից է, երբ Լեռնային Ղարաբաղը չի կարողացել իրեն ներկայացնել և ստիպված է եղել միջնորդավորված՝ ՀՀ-ի միջոցով իր դիրքորոշումները տեղ հասցնել»:

Պատգամավորի խոսքով՝ ապագային նայելով ՀՀ-ի բանակցողները պարբերաբար իրենց գործընկերներին (Արցախի. խմբ.)՝ բառ առ բառ ներկայացնում են, թե ինչի շուրջ են բանակցում: Բոլոր քայլերը կատարվում են՝ հայտնելով դրանց մասին ԼՂ-ի իշխանություններին, ներառյալ Ստեփանակերտի և Բաքվի միջև երկխոսության անհրաժեշտության մասին: