Պարգևավճարներո՞վ են մարվում այդքան բարձր վարկերը. լրագրողի հարցը պատգամավորին՝ Պապիկյանի ու Միրզոյանի տների մասին

«Որքան տեղյակ եմ, գործի փաստական հանգամանքներն այն են, որ այդ բնակարանը ձեռք է բերվել բանկի կողմից տրված հիփոթեքի միջոցով»: ԱԺ ճեպուզրույցներում ասաց ԱԺ «Քաղաքացիական պայմանագիր» խմբակցության պատգամավոր Հերիքնազ Տիգրանյանը՝ պատասխանելով պաշտպանության նախարար Սուրեն Պապիկյանի կողմից Երևանում ձեռք բերված թանկարժեք բնակարանի մասին հարցին:

Հերիքնազ Տիգրանյանը նշեց, որ պաշտոնատար անձը հայտարարատու սուբյեկտ է և  նրա գույքի, եկամուտների հայտարարագրումը հրապարակման ենթակա փաստաթուղթ է, որը կարող են բոլորը տեսնել։

«Եթե որևէ անձ ողջամիտ կասկածներ ունի, որ այստեղ կարող են լինել կոռուպցիոն ռիսկեր, դրա համար կան և իրավապաշտպան կազմակերպերություններ, հակակոռուպցիոն մարմիններ, կարող են դիմել այդ կառույցներին, որոնք ունեն իրավական բոլոր լծակներն այդ հարցը քննության առարկա դարձնել իրավապահ մարմինների մոտ՝ ներկայացնելով հաղորդում»,- ասաց ՔՊ-ական պատգամավորը։

Նա չպատասխանեց լրագրողի հարցին, թե՝ պարգևավճարներո՞վ են մարվում այդքան բարձր վարկերը: Թեև դա լրագրողի հարցի լրացումն էր, սակայն Տիգրանյանն այն դիտարկեց երկրորդ հարց և չպատասխանեց:

Նա դիմեց վարողի պաշտպանությանը. «Մեկ հարցից ավելի հարց է տալիս նույն լրագրողը»,- ասաց նա՝ այդպես էլ չհասկանալով, որ դա առաջին հարցի շարունակությունն է: