Սա է ձեր հավաքական կերպարը՝ արտոնյալ պայմաններով կես միլիոն դոլարանոց վարկեր ստանալը՝ օդից. Մամիջանյան

Հաղորդում ներկայացնել մի կառույցի կամ քաղաքական թիմի թևին, որոնք գալիս են Ազգային ժողով, խոսում զորամասերի սեփականաշնորհման մասին, այնինչ նախորդ տարում 70 նմանօրինակ օբյեկտ ՀՀ կառավարության որոշմամբ սեփականաշնրհվել է: Ես այդ մարդկանց դեմ ի՞նչ հաղորդում ներկայացնեմ: Այսօր Ազգային ժողովում կայացած ճեպազրույցի ժամանակ նման կերպ արձագանքեց ԱԺ «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով այն հարցին, թե արդյոք ընդդիմադիր որևէ գործչի կողմից ներկայացվելո՞ւ է հաղորդում՝ Պաշտպանության նախարար Սուրեն Պապիկյանի սկանդալային կոռուպցիոն պատմության առնչությամբ:

Շարունակելով խոսքը՝ Մամիջանյանը նշեց. «Մի երկու տարի առաջ մեկը կար, որ ասում էր, որ Հայաստանում համակարգային կոռուպցիա չկա... Ցավոք, այդ մեկը հիմա էլ կա: Բայց բոլորովին վերջերս կոռուպցիայի ընկալման ինդեքսը հրապարակվեց, որտեղ Հայաստանը խայտառակ նահանջ է արձանագրել: Ընդ որում, ոչ միայն էական է նահանջի փաստը, այլև էական է, թե ինչ բաղադրիչներով ու ինդեքսավորման ինչ ցուցանիշներով: Դրանք երկուսն են. առաջինը ժողովրդավարական ինստիտուտների կայացվածությունն է: Ի միջի այլոց ասեմ, որ 2021-ին էլ էր դրանով հետնահանջ: Ողջույններս Արարատ Միրզոյանին իր բաստիոնով: Եվ երկրորդը վերաբերում է նաև տնտեսական ենթակառուցվածներին: Տնտեսական կազմակերպման ինստիտուտների որակին և արդյունավետությանը: Որտեղ նույնպես այդ կետով է նահանջ»,- նշեց Մամիջանյանը:

Վերջինիս համար նաև անհասկանալի է մի հարց, թե այդ որ բիզնես թրեյները հայտնվեց Հայաստանում ու ՔՊ-ի բոլոր պաշտոնյաների բարեկամները դարձան թույն բիզնեսմեններ: Մինչ այդ նրանց մոտ ստացվում էր նիսիայով գարեջուր խմել, իսկ հիմա ստացվում է բազմամիլիոնանոց տենդերներ հաղթել:

«Դե թող սկսեն թրեյնինգներ վարեն, քանի որ մեր ազգաբնակչությունը ևս բիզնես ջիղ ունի: Ես էլ եմ ժամանակին բանկում վարկ ունեցել՝ մոտ 10 տարի առաջ: Մի դափոն թուղթ էի տարել՝ 1 միլիոն դրամ տվեցին: Ինչքա՞ն էին ստացել Արարատ Միրզոյանն ու Սուրեն Պապիկյանը: Կարծեմ՝ կես միլիոն, թե մի միլիոն դոլար էր: Ինչի՞ համար եմ ես այս ամենն ասում: Ազգային ժողովի մի պատգամավոր կար, որ ասում էր, որ մեր հավաքական կերպարն է բուտերբրոդ և այլն և այլն... Այ սա՛ է ձեր հավաքական կերպարը՝ արտոնյալ պայմաններով կես միլիոն դոլարանոց վարկեր ստանալը՝ օդից, 16 հազար դոլարով Ձորաղբյուրում և Ջրվեժում առանձնատները: Թե դրանով կզբաղվեն, թե չեն զբաղվի ուժայինները, դա ինձ չի հետաքրքրում»,- նշեց Մամիջանյանը: