Ինչպես Արցախը կպատասխանի Փաշինյանի հերթական խայտառակությանը

Նիկոլ Փաշինյանը հերթական անգամ պետական բյուջեի հաշվին կնոջ և աղջկա հետ գործուղման է մեկնել և այս անգամ երկու օրով հանգրվանել Գերմանիայում, ինչը գուցե չաներ, եթե իմանար, թե ի՞նչ տհաճ անակնկալ է իր համար նախապատրաստել Գերմանիայի կանցլեր Օլաֆ Շոլցը։

Փաշինյանի հետ հանդիպման ժամանակ Եվրամիության անդամ կարևորագույն և առանցքային երկրի՝ Գերմանիայի ղեկավարը տառացիորեն ասաց հետևյալը.

«Գերմանիան մտահոգված է Հայաստանի և Ադրբեջանի սահմանին անկայուն և ԼՂ-ում գնալով սրվող հումանիտար իրավիճակով: Գերմանիան կարևորում է խաղաղ հանգուցալուծման հասնելը՝ Հայաստանի և Ադրբեջանի տարածքային ամբողջականության, ինչպես նաև ԼՂ-ի քաղաքացիների ինքնորոշման իրավունքի տեսանկյունից: Ստատուս քվոն չի կարող շարունակվել, և պետք է երկարաժամկետ լուծման հանգել՝ ի բարօրություն մարդկանց: Այս տեսանկյունից անհրաժեշտ է հասնել խաղաղ հանգուցալուծման, Հայաստանի և Ադրբեջանի տարածքային ամբողջականության, ինչպես նաև ԼՂ-ի քաղաքացիների ինքնորոշման իրավունքի տեսանկյունից: Ընդ որում, այս բոլոր սկզբունքները հավասարազոր են»։

Գերմանիայի կանցլերն ասաց այն, ինչը 2020 թվականից հետո չեն ասել Նիկոլ Փաշինյանն ու «Քաղաքացիական պայմանագիր» կուսակցության որևէ մեկ անդամ։

Իշխանության մաս կազմողների համար անգամ կուլիսներում է արգելված խոսել Արցախի ինքնորոշման իրավունքի մասին, որովհետև իշխանության համար վաղուց Արցախն Ադրբեջան է՝ առանց ինքնորոշման իրավունքի հնարավորության։

Իշխանության ներսում ունենալով նման միաձայն կոնսենսուս, ի հայտ է գալիս Գերմանիայի պես առանցքային երկրի կանցլերը ու շեշտում, որ Արցախի ինքնորոշման իրավունքը կարևոր է՝ ասել է թե՝ Արցախը Գերմանիան չի ճանաչում Ադրբեջանի կազմում։

Գերմանիայի կանցլերը խիստ անհարմար դրության մեջ է դրել Փաշինյանին, ում համար Արցախը ոչ թե ինքնորոշված պետություն է լինելու, այլ Ադրբեջանի կազմում թալիշների, լեզգիների չափ ինքնավարություն ունեցող էթնիկ մի միավոր։

Գերմանիայի կանցլերի հայտարարությունը զրոյացնում է նաև Նիկոլ Փաշինյանի այն ելույթը, թե, իբր, միջազգային հանրությունը Հայաստանի իշխանությունից պահանջում է իջեցնել Արցախի կարգավիճակի հարցում նշաձողը, ինչն Արցախի համար հավասարազոր է Ադրբեջանի կազմում հայտնվելուն։

Գերմանիայի կանցլերը հաստատեց՝ Փաշինյանը ստել է նման հայտարարություն անելով, որովհետև այդ նույն միջազգային հանրության մաս կազմող Գերմանիան նշաձող իջեցնելու հարց չի բարձրացրել։

Գերմանիայում Փաշինյանի խայտառակությունից հետո հիմա հերթն Արցախի իշխանություններինն է, որոնք պետք է փոխեն իրենց վերաբերմունքն Արցախը հանձնելու քաղաքականությունն առաջ տանող Հայաստանի իշխանությունների նկատմամբ։

Եթե Արցախի ինքնորոշման իրավունքն Արցախի այսօվա ղեկավարության համար կարմիր գիծ է, ուրեմն այդ կարմիր գիծը հատողին պետք է ցույց տան իր տեղն ու, անհրաժեշտության դեպքում, գործեն ի հեճուկս Հայաստանի իշխանության։

NEWSPRESS.am