Կարմրուկի դեպքերով սահմանափակումների չենք գնում, բայց իրավիճակը հսկողության կարիք ունի, պացիենտների մեծ մասն էլ Երևանից է. Անահիտ Ավանեսյան

Դուք լավ գիտեք, որ «Քովիդ»-ը նոր ու դեռ երբևէ չշրջանառվող, անհայտ վարակ էր, որի կառավարման մասով պետք է ասեմ, որ Հայաստանը մշտապես հետևել է այդ պահին առկա գիտահեն տեղեկատվությանը, իրականացրել բոլոր անհրաժեշտ միջոցառումները: Հայաստանն իր ռեսուրսների, համակարգի ամբողջ պոտենցիալն օգտագործելով՝ արձագանքել է վարակի տարածմանն ու կանխմանը: Այս մասին այսօր կայացած մամուլի ասուլիսի ժամանակ ասաց ՀՀ առողջապահության նախարար Անահիտ Ավանեսյանը՝ պատասխանելով այն հարցին՝ արդյոք կարմրուկի վարակման դեպքերը գերատեսչությունների կողմից վերահսկվո՞ւմ, թե՞ նման են «Քովիդ»-ի դեպքերին, երբ գերատեսչությունները չգիտեին ինչ անել:

Անդրադառնալով կարմրուկի դեպքերին` Ավանեսյանը նշեց, որ կարմրուկը, ի տարբերություն «Քովիդ»-ի, վաղուց հայտնի հիվանդություն է, բռնկումներ Հայաստանում ևս եղել են: Վերջինը եղել է 2006 և 2007 թվականներին: Ուստի բավականին փորձ կա դեպքերի բռնկումները կանխարգելելու, դրանք ճիշտ ժամանակին զսպելու, և հնարավորինս լավ արդյունք ունենալու բուժման ընթացքում:

«Ուրբաթ օրվանից, երբ առաջին դեպքը հայտնաբերվեց լաբորատոր հաստատումից հետո, մենք հրավիրել ենք աշխատանքային քննարկում: Իմ հրամանով ստեղծվել է խումբ, որտեղ ներգրավված են բոլոր մասնագետները՝ ՀՎԿ-ից, բուժական ոլորտից, նեղ մասնագետներ: Բացի դրանից մենք ունեինք «Քովիդ»-ի ժամանակից ստեղծված միջազգային մասնագետների խումբ՝ սփյուռքի հայրենակիցներից կազմված, որն այս ընթացքում գործել է և շարունակելու է գործել: Կարծում եմ՝ նման ներկայացվածությամբ մասնագիտական խումբն անում է բոլոր անհրաժեշտ քայլերը: Մենք հավաքագրում ենք օրվա ընթացքում անհրաժեշտ տեղեկատվությունը, և մեր որոշումներն ըստ այդ թարմացվող տեղեկատվության փոփոխում ենք և համապատասխանեցնում իրավիճակին: Այս պահին որևէ սահմանափակման գործողությունների կարիք դեռ չկա: Մենք առաջին օրերին, ըստ պլանի, կառաջնորդվենք՝ այս պահին համաճարակային իրավիճակին համապատասխան, բայց նորից եմ շեշտադրում, որ մենք ժամանակ առ ժամանակ թարմ տեղեկատվություն ենք տրամադրելու և հանրությանն իրազեկ ենք պահելու բոլոր ասպեկտների վերաբերյալ»,- ասաց Առողջապահության նախարարը: 

Նրա խոսքով՝ այս պահին մարզերում սահմանափակման կամ Երևան-մարզեր շփումները սահմանափակելու ոչ մի խնդիր չկա: Այս պահին պացիենտների մեծ մասը Երևանից է: