Քաղաքացիները, որոնք չեն հիշում կամ չեն պատվաստվել կարմրուկի դեմ, ապա կարող են դիմել և պատվաստվել. նախարար

Բոլոր պոլիկլինիկաներն ունեն բոլոր պատվաստանյութերի անհրաժեշտ քանակները: Մենք ունենք նաև հաջորդ խմբաքանակի ներկրում, ուստի պատվաստանյութերի առկայության հետ կապված որևէ խնդիր չունենք: Այս մասին այսօր կայացած մամուլի ասուլիսի ժամանակ հայտարարեց Առողջապահության նախարար Անահիտ Ավանեսյանը:

Նրա խոսքով՝ առաջիկա օրերին կստեղծվեն 1-2 շարժական կետեր, որպեսզի ավելի հեշտ ու հասանելի լինի պատվաստումը քաղաքացիների համար:

«Մեր՝ «Քովիդ»-ի փորձը ցույց տվեց, որ երբեմն պոլիկլինիկա այցելելը բավական բարդ է ժամերի և այլնի առումով, դրա համար հնարավորինս կստեղծվեն բոլոր պայմանները, որպեսզի հեշտ ու արագ կերպով կարիք ունեցող քաղաքացիները պատվաստվեն»,- նշեց Ավանեսյանը:

Վերջինս ասաց, որ, մեծահասակները երբեմն չեն հիշում՝ արդյոք փոքր ժամանակ պատվաստվել են, թե՞ ոչ: Նրանք, եթե կոնտակտավոր են, ապա 72 ժամվա ընթացքում արդեն իսկ կծածկվեն այս պահին գործողությունների շրջանակով և կպատվաստվեն: Սա կանխարգելիչ լուրջ միջոցառում է: Ավանեսանը հիշեցրեց, որ 2007 թվականին իրականացվել է պատվաստման լայն արշավ և դրա շրջանակներում 27 տարեկանը լրացածները հնարավորությում ստացան պատվաստվել ԿԿԽ: 

«Այո՛ քաղաքացիները, որոնք չեն հիշում կամ չեն պատվաստվել, ապա կարող են դիմել և պատվաստվել՝ կանխարգելելու հիվանդությամբ վարակվելը»,- նշեց Առողջապահության նախարարը: