Իմ տեղեկություններով՝ կարմրուկը հիվանդանոցի ներսից է տարածվել, և մի ինֆորմացիա կա, որ տարածման օղակում եղել է չպատվաստված բուժաշխատող. Թորոսյան

Այսօրվա դրությամբ Հայաստանում ունենք կարմրուկի վարակի 2 դեպք: Ես շատ եմ կարևորում մեր բոլորի տեղեկացված լինելը, ուստի որոշեցի նման ֆորմատով հանդես գալ: Այս մասին ուղիղ եթերում հայտարարեց ՔՊ-ական պատգամավոր, Առողջապահության նախկին նախարար Արսեն Թորոսյանը: 

Նրա խոսքով՝ ինչպես գերատեսչությունն այսօր նշել է, դեպքերը եղել են բերովի ու տարածում են ստացել, ինչը ցավալի է ու վաղուց նման իրավիճակ չի եղել: 

«Իմ տեղեկություններով՝ կարմրուկի տարածման դեպքը ներհիվանդանոցային է եղել: Այսինքն՝ հիվանդանոցի ներսից է տարածվել՝ հիվանդ երեխայից մյուսներին: Եվ մի ինֆորմացիա կա, որ տարածման օղակում եղել է չպատվաստված բուժաշխատող, ինչն ինքնին ցավալի է: Բժիշկները, բուժաշխատողները կոչված են օգնել մեզ, որպեսզի դիմակայենք հիվանդություններին, բայց երբեմն նրանք էլ են տուրք տալիս և ոչ միայն իրենք ու իրենց երեխաները չենք պատվաստվում, այլ նաև կոչ են անում ուրիշներին չպատվաստվել: Փաստացի մենք ունենում ենք բավականին մեծ թվով չպատվաստված երեխաներ»,- նշեց Թորոսյանը:

Նա փաստեց, որ, բարեբախտաբար, ունենք բարձր պատվաստման ցուցիչ: ԿԿԽ-ի ծածկույթը սովորաբար տատանվում է 90-95%-ի շրջանակներում: Իհարկե, որոշ տեղեր ավելի շատ, իսկ որոշ տեղեր էլ՝ ավելի քիչ: Սակայն այդ 5%-ը բավականին մեծ թվով քաղաքացիներ են: Հետևաբար, ամեն դեպքում, բոլոր չպատվաստված քաղաքացիները պետք է պատվաստվեն: 

«Մեր գործընկեր բժիշկներին էլ կոչ եմ անում տուրք տալ իրենց ակադեմիական գիտելիքներին, ոչ թե տարատեսակ նյութերին՝ ինտերնետից և այլ տեղերից, որոնք հակառակն են կոչ անում: Դուք պարտք ունեք փրկելու կյանքեր և ոչ թե վտանգի տակ դնել կյանքերը, հարգելի՛ գործընկերներ: Հենց հիմա էլ, եթե դուք, ձեր երեխաները չեք ստացել ձեր պատվաստանյութերը՝ կարմրուկի կամ այլ, ապա առաջինը դուք պետք է պատվաստվեք և պատվաստեք ձեր երեխաներին, ոչ թե չպատվաստվելու կոչեր անեք»,-նշեց Թորոսյանը և հիշեցրեց, որ վերջին խոշոր բռնկումը տարածաշրջանում եղել է Վրաստանում, որին Հայաստանն օգնել է պատվաստանյութով՝ ուղարկելով 30 000 դոզա: Ուստի, որպեսզի չհայտնվենք համաճարակային վիճակում, ապա ովքեր չեն ստացել 2 դոզա, ապա պետք է գնան ու պատվաստվեն: