Հակասություն չե՞ք տեսնում, կարմրուկի տարածման՝ Ձեր և Թորոսյանի վարկածների մեջ․ լրագրողը՝ Ավանեսյանին

ՀՀ առողջապահության նախարար Անահիտ Ավանեսյանը կառավարության նիստից հետո, չցանկացավ պատասխանել լրագրողների դիտարկմանը, ըստ որի, իր և ՔՊ-ական պատգամավոր Արսեն Թորոսյանի տեսակետը՝ կապված կարմրուկի տարածման հետ, տարբերվում են։

Ավանեսյանը կրկնեց իր թեզը, որ վիրուսը Հայաստան է ներթափանցել արտերկրից: 

Լրագրողների հարցին, թե՝ հակասություն չի՞ տեսնում նա արդյոք իր և Թորոսյանի պատասխանների մեջ՝ Անահիտ Ավանեսյանը չպատասխանեց և արագ հեռացավ:

Հիշեցնենք, որ Անահիտ Ավանեսյանը հայտարարել էր, թե «Կարմրուկի առաջին դեպքը Հայաստան է ներթափանցել արտերկրից, հիվանդացել է բալիկ», որից էլ տարածվել է վարակը։

Նախարար Ավանեսյանի այս հայտարարությունից մեկ ժամ էլ չէր անցել, երբ առողջապահության նախկին նախարար, ՔՊ-ական պատգամավոր Արսեն Թորոսյանը հայտարարեց, թե՝ իր տեղեկություններով, «կարմրուկի տարածումը ներհիվանդանոցային է եղել. տարածման օղակում դեր է ունեցել չպատվաստված բուժաշխատողը»։ 

Թորոսյանը նաև կոչ է արել պատվաստվել կարմրուկի դեմ ու հետևել միայն պաշտոնական լրահոսին․ «Մենք ձեզ ապացուցել ենք, որ ոչինչ չենք թաքցնում»։