ՔՊ-ականները շարունակում են բնակարաններ ձեռք բերել․ «Հրապարակ»
«Հրապարակ» թերթը գրում է.
Իհարկե, բնակարան ձեռք բերելը վատ բան չէ, եւ բնական է, որ մարդիկ ողջ կյանքում իրենց բնակարանային պայմաններն են բարելավում՝ ձգտելով ավելի հարմարավետ պայմաններում ապրել։ Վերջերս բարձրացած աղմուկը Սուրեն Պապիկյանի՝ «Ջերմուկ գրուպի» կողմից կառուցված «Բյուրեղ» էլիտար թաղամասում ձեռք բերած բնակարանի հետ կապված, մի կողմից հասկանալի է՝ աղքատ հասարակությանը բնորոշ, մյուս կողմից՝ ոչ այնքան։ Ամեն դեպքում, հասարակությունն իրավունք ունի իմանալ, թե իր պաշտոնյաներն ինչպես են ապրում, ինչքանով է նրանց բարեկեցությունն ավելանում, եւ արդյոք դրանում չկա՞ն կոռուպցիոն ռիսկեր։
Մենք տեղեկացանք, որ Արշակունյաց պողոտա 18/4 հասցեում, բացի պաշտպանության նախարար Սուրեն Պապիկյանից, բնակարան է ձեռք բերել եւս 3 պաշտոնյա՝ վարչապետի աշխատակազմի ղեկավար, ՔՊ-ական Արայիկ Հարությունյանը, ՔՊ-ական Տրդատ Սարգսյանը եւ ԱՄՆ-ում ՀՀ դեսպան Լիլիթ Մակունցը։ Մեր աղբյուրն ասաց, որ ՔՊ-ականների բնակարանների ձեռքբերման կազմակերպական հարցերը կարգավորել է Սուրեն Պապիկյանը։ Մենք Արայիկ Հարությունյանից փորձեցինք ճշտել, թե ճի՞շտ է այն տեղեկությունը, որ ինքն էլ է այդ թաղամասում բնակարան գնել, ի պատասխան՝ կառավարության լրատվական վարչությունից ասացին, որ նա հայտարարատու պաշտոնատար անձ է, եւ նրա գույքի ու եկամուտների վերաբերյալ տեղեկություններին կարելի է ծանոթանալ նրա տարեկան հայտարարագրից։ Հարությունյանի 2022 թվականի հայտարարագիրը դեռեւս հրապարակված չէ, սակայն ուշագրավ դրվագներ կան նրա՝ 2021 թվականի հայտարարագրում։ Հարությունյանը 2021 թվականին, որպես փոխառություն, Ջերմուկ գրուպին տվել է 7 մլն դրամ՝ սա, հավանաբար, կանխավճարն է, եւ Խաչատուր Սուքիասյանի ընտանիքին պատկանող Հայէկոնոմբանկից որպես վարկ վերցրել է 28 մլն 100 հազար դրամ։ 2021 թվականի ավարտին նա ունեցել է պարտք 27 մլն 993 հազար դրամ՝ որպես բնակարանի ձեռքբերման հիպոթեքի մայր գումար։ Հարությունյանը 2021 թվականին որեւէ անշարժ գույք չի հայտարարագրել։
Սուրեն Պապիկյանի սանիկ, Վայոց Ձորի նախկին մարզպետ, ՔՊ-ական պատգամավոր Տրդատ Սարգսյանից եւս փորձեցինք մեկնաբանություն ստանալ, սակայն նա մեր զանգերին չպատասխանեց։ Սարգսյանի 2021 թվականի տարեկան հայտարարագրում Երեւանի կենտրոնում որեւէ գույք հայտարարագրված չէ, թեեւ, մեր տեղեկություններով, նա «Բյուրեղ» թաղամասում բնակարանից բացի նաեւ ավտոտնակ է ձեռք բերել։ 2021-ին Տրդատ Սարգսյանը «Առաջին հիպոթեքային» վարկային կազմակերպությունից 19․5 մլն դրամ վարկ է վերցրել, բացի այդ, 3 գույք է վաճառել՝ 40 մլն, 4 մլն, 8.5 մլն դրամ արժողություններով։ Ի դեպ, Տրդատ Սարգսյանը Վայոց Ձորի մարզպետ աշխատելու տարիներից ջերմ հարաբերություններ ունի Ջերմուկի գործող քաղաքապետ Վահագն Արսենյանի եւ Արսենյանների ընտանիքի հետ, ում պատկանում են «Ջերմուկ գրուպ» ընկերությունը եւ նշված թաղամասը։ Ինչ վերաբերում է Լիլիթ Մակունցին, ապա նա էլ 2021 թվականին որեւէ անշարժ գույք չի հայտարարագրել, բայց նույն Ջերմուկ գրուպին, որպես փոխառություն, տվել է 34.2 մլն դրամ եւ Հայէկոնոմբանկից վերցրել է խոշոր վարկ՝ 30.7 մլն դրամի չափով։
