Շարմազանովը՝ ընդդիմության պայքարի մասին

Քաղաքական պայքարը քյանդրբազություն չէ, որ ում միտքն ինչ գա, հելնեն փողոց, պայքարեն: Մի անգամ մեր նախագահն ասաց, որ քաղաքական գործիչը պետք է 3-4 քայլ առաջ մտածի, հաշվարկած լինի: Եթե դու դուրս ես գալիս փողոց ու 4-րդ, 5-րդ քայլը չգիտես ու նաև չգիտես, թե ինչ պետք է անես, ավելի լավ է՝ ոչինչ չանես: Եթե քո աչքերը փակեն, ապա քայլ չպետք է անես, որովհետև, եթե քայլ արեցիր կարող է անդունդն ընկնես ու այնտեղից քեզ որևէ մեկը չի հանի: Այսօր կայացած մամուլի ասուլիսի ժամանակ հայտարարեց ՀՀԿ խոսնակ Էդուարդ Շարմազանովը՝ խոսելով ընդդիմության պայքարի մասին: 

Նրա խոսքով՝ հայ ժողովուրդը, հայ ազգն ունի մեկ փամփուշտի, մեկ կրակոցի հնարավորություն՝ քաղաքական: Շարմազանովը շեշտեց, որ սա բռնության կոչ չէ, այլ ինքը նկատի ունի հենց քաղաքական կողմը:

«Դա պետք է անել ճիշտ աշխատանքի արդյունքում: Յուրաքանչյուր պետություն, յուրաքանչյուր ժողովուրդ ունի վայրէջքների ու վերելքների շրջաններ: Իհարկե, մերը վայրէջքի շրջան է: Բայց այս վայրէջքից հետո վերելք է գալու: Ես ասում եմ՝ լավ է լինելու: Կրկնում եմ՝ Նիկոլ Փաշինյանն իր պատմական մինիմումին է հասել: Մնացածն արդեն մտավորականության, հասարակության, քաղաքական էլիտայի, ինչու չէ նաև լրատվամիջոցների խնդիրն է, որպեսզի համախմբվեն: Ինքը երբեք այսքան ցածր վստահություն չի ունեցել, ինչքան ունի հիմա: Իր թիմը ևս: Որտեղ ընդդիմությունը համախմբվում է՝ Նիկոլը պարտվում է: Օրինակ՝ Մասիս, Բերդ: Ճիշտ է՝ ով հաղթում է, մեծ մասին բռնում են, քանի որ չեն հանդուրժում, որ փոքր համայնքում մեկը կարող է իրենց հաղթել»,- նշեց Շարմազանովը: