Ինչու նախարարությունը չի հրապարակում քարտեզի վրա ծախսված գումարի չափը

2020 թ. համավարակի փուլում հարցում էինք ուղարկել ՀՀ առողջապահության նախարար Արսեն Թորոսյանի անունով՝ խնդրելով ներկայացնել, թե պետական բյուջեից որքա՞ն դրամ է ծախսվել https://covid19-map.armed.am/ կայքէջում ՀՀ առողջապահության նախարարության կողմից տեղադրված և 50 մետրի ճշտությամբ ինքնամեկուսացված քաղաքացիների հասցեները մատնանշող քարտեզի պատրաստման ամբողջական աշխատանքների համար: Գրելէ պատմաբան, հասարակական գործիչ Վահե Սարգսյանը։

Նա նշել է, որ ի պատասխան հարցման՝ նախարարությունից տեղեկացրել են, թե նշված քարտեզի պատրաստման աշխատանքների համար ՀՀ պետական բյուջեի «Առողջապահություն» բաժնից գումար չի ծախսվել:

«Իրականում մենք չէինք հարցրել՝ ՀՀ պետական բյուջեի «Առողջապահություն» բաժնից գումար ծախսվե՞լ է, թե՞ ոչ:

Մենք հարցադրումը շատ պարզ էր՝ պետական բյուջեից որքա՞ն է ծախսվել: Նախարարությունից զլացել են պատասխանել, թե այդ դեպքում՝ պետական բյուջեի ո՞ր բաժնից է ծախսվել գումար և որքա՞ն։

Այս հարցադրման պատասխանն ստանալու հույսով այս անգամ դիմեցինք կառավարության աշխատակազմին: Ցավոք, կառավարության աշխատակազմը մեր հարցումը վերահասցեագրել էր կրկին առողջապահության նախարարությանը, որտեղից էլ, բնականաբար, ստացանք նախորդ պատասխանը մատնանշող և ոչ մի նոր տեղեկություն չպարունակող պատասխան:

Փորձելով կառավարությունից առավել համառ գտվել՝ կրկին դիմեցինք Արսեն Թորոսյանին: Այս անգամ, սակայն, այլ հարցադրմամբ, այն է՝ որքա՞ն դրամ է ծախսվել քարտեզի պատրաստման ամբողջական աշխատանքների համար և ի՞նչ գումարներով:

Հարցադրման մեջ պետական բյուջեի մասին չհիշատակելով՝ հույս ունեինք, որ նախարարությունը գոնե այս անգամ չի խուսափի պատասխանից:

Ցավոք, պնդաճակատության «մրցույթում» նախարարությունը հաղթեց. «պատասխանում» հիշատակված էր նախորդ «պատասխանը»:

Ցավոք, այդպես էլ անհասկանալի մնաց՝ քարտեզի համար պետական բյուջեից կամ այլ միջոցներից որքա՞ն գումար է ծախսվել, և որքա՞ն է եղել դրա չափը:

Հիշյալ տեղեկությունը համառորեն գաղտնի պահելու իրողությունը լիարժեքորեն մեզ հիմք է տալիս ենթադրելու, որ շատերի համար ծիծաղաշարժ և համավարակի կանխմանը զրոյական օգուտ բերած այդ քարտեզի վրա պետական կամ այլ միջոցներից ծախսվել են, այս պարագայում, կարելի է ասել, անիմաստ վատնվել են ահռելի գումարներ, և այդ թիվն այնքան մեծ է, որ երեք իրար հաջորդող նամակներին ի պատասխան՝ առողջապահության նախարարությունը «երկու ոտքը դրեց մեկ կոշիկի մեջ» և ամեն գնով գաղտնի պահեց ծախսված միջոցների մասին տեղեկությունը:

Այս օրերին, երբ պարզվում է, որ համավարակի փուլում այդ նույն պետական մարմինների բարձրագույն ներկայացուցիչները կատարել են առերևույթ հանցագործություններ և չարաշահումներ, և արդեն կոնկրետ մարդկանց խումբ է մատնանշվում, ես վերստին պահանջում եմ՝ հրապարակել քարտեզի վրա ծախսված պետական բյուջեի չափը, իսկ եթե դա արվել է ոչ պետական բյուջեի հաշվին, ապա կոնկրետ նշել՝ ո՞վ է վճարել և որքան:

Ես լուրջ կասկածներ ունեի և ունեմ, և չի բացառվում, որ այստեղ ևս բացահայտելու լիքը բան կա...»,–գրել է Վահե Սարգսյանը։