Այդ ամենը ապօրինի է և նպատակ ունի լռեցնել Պետրոսյանին, հաշվի առնելով նրա սուր ընդդիմադիր հայացքները. Ղազարյան

Ես շատ մեծ ուշադրությամբ հետևել եմ իմ շատ հարգարժան գործընկերոջ նկատմամբ իրականացվող` ոստիկանության ապօրինի գործողություններին: Այս մասին «Հայելի» ակումբում տեղի ունեցած ասուլիսի ժամանակ ասաց ՍԴ աշխատակազմի նախկին ղեկավար Էդգար Ղազարյանը:

Նրա խոսքով՝ Գևորգ Պետրոսյանին ըստ էության հետապնդել են, փորձել ինչ-որ պատրվակ, առիթ ստեղծել նրան ձերբակալելու համար:

 «Պետրոսյանն այդ առիթը չի տվել: Երբ մոտեցել է իր տան մուտքին, և քանի որ հանձնարարություն են ստացել ոստիկանները, որ նրան պետք է ձերբակալեն, սկսել են նրա նկատմամբ ապօրինի գործողություններ իրականացնել: Նա էլ պատահական մարդ չէ: Իրավաբան է, շատ լավ հասկանում է և՛ ոստիկանության իրավունքների, պարտականությունների շրջանակը, և՛ իր՝ որպես քաղաքացու իրավունքների շրջանակը: Բնականաբար, նա չի ենթարկվել ոստիկանության պահանջներին: Մեր օրենսդրությունը ենթադրում է, որ մեր քաղաքացիները պետք է ենթարկվեն ոստիկանության օրինական պահանջներին, ոչ թե բոլոր պահանջներին: Եթե ոստիկանությունը մեզ մի բան է ասում, ապա դա չի նշանակում, որ նրա պահանջն օրինական է: Ոստիկանի պահանջը կարող է լինել նաև անօրինական: Այդ գնահատականը պետք է տա այդ մարդը, որի նկատմամբ այդ գործողությունը կատարվում է: Գևորգ Պետրոսյանի դեպքում էլ դժվար չէ հասկանալ, թե ոստիկանության որ պահանջն է օրինական և որն անօրինական»,- նշեց Ղազարյանը:

Նա մեջբերեց ոստիկանության հաղորդագրությունից մի հատված առ այն, որ մեքենան անկանոն երթևեկելու հետ կապված նրան կանգնեցրել են: 

«Ի՞նչ է նշանակում մեքենան անկանոն երթևեկել: Գոյություն ունեն ճանապարհային երթևեկության կանոններ: Եթե քաղաքացին չի խախտել ճանապարհային երթևեկության կանոնները, ինչի մասին ոստիկանության հաղորդագրության մեջ ոչ մի բան չկա, ապա դու քաղաքացուն անհանգստացնելու ի՞նչ իրավունք ունես: Այսինքն՝ ակնհայտորեն ապօրինի միջամտել են մարդու ազատ տեղաշարժման իրավունքին: Նա էլ, լինելով իրավաբան, չի ենթարկվել: Նրան բռնի գործողություններով տեղափոխել են ոստիկանության բաժին և ձերբակալել են մի արարքի համար, որը նախատեսում է ընդամենը տուգանք, այն էլ՝ դատարանի որոշմամբ»,- նշեց Ղարզարյանը՝ անելով հարցադրում, որ եթե մարդը վարչական պատասխանատվություն է ենթադրում, ապա ինչպե՞ս են ձերբակալության մասին որոշում կայացնում: 

Ղազարյանի խոսքով՝ այս ամենն ապօրինի է: Եվ հաշվի առնելով Պետրոսյանի քաղաքական, ընդդիմադիր սուր հայացքները, քննադատական խոսքը՝ ակնհայտ է, որ այդ ամենն ուղղված է նրան լռեցնելու, նրա գործունեությանը միջամտելուն: