Երևանի ավագանու ընտրությունների անցկացման վերաբերյալ որոշում այս պահին չունենք. Փաշինյանը 2018-ից հետո քաղաքապետերի կատարած աշխատանքը վերագրեց իրեն

2018 թվականի ընտրություններում մենք ստանձնել ենք պարտավորություններ: Ես 2017թ. Երևանի քաղաքապետի ավագանու ընտրություններում եղել եմ Երևանի քաղաքապետի թեկնածուն, մեր նախընտրական ծրագիրն ուժի մեջ է, և երբ մենք հաղթել ենք քաղաքապետի ընտրություններում, մենք այդ պահից սկսած իրագործում ենք մեր նախընտրական ծրագրերը, խոստումները, այն, ինչ որ տվել ենք Երևանի բնակիչներին: Կարծում եմ՝ բավականին հաջող ենք կատարում մեր խոստումները: Այս մասին այսօր հրավիրված մամուլի ասուլիսում ասաց Նիկոլ Փաշինյանը՝ պատասխանելով այն հարցին, թե արդյոք կոռուպցիա չէ՞ այն, որ փոխքաղաքապետ Տիգրան Ավինյանը Երևանի բյուջեով նախատեսված ծրագրերը ծառայեցնում է իր քարոզարշավին:

«2018 թվականից մինչ օրս Երևանում շրջանառությունից դուրս է շուրջ 1000 հուսահատության «Գազել» և դա ընդհանուր «Գազել»-ների թվի 70 տոկոսն է: Մնացած «Գազել»-ները նույնպես շրջանառությունից կհանվեն: Դուք արդեն գիտեք, որ ավտոբուսերի խմբաքանակները Երևանում են և գալիս են և առաջիկայում նաև երթուղիներ դուրս կգան: Այսօրվա դրությամբ 1000-ից ավել մահվան վերելակներ փոխարինվել են լրիվ նոր վերելակներով և դրանք եղել են 2017թ. իմ՝ որպես Երևանի քաղաքապետի թեկնածու, նախընտրական ծրագրի կարևորագույն դրույթները»:

Քանի որ հարցը վերաբերում էր քաղաքային բյուջեով կատարված աշխատանքները Տիգրան Ավինյանի քարոզարշավին ծառայեցնելուն, Փաշինյանն ասաց, որ դա իրենց քաղաքական ուժի ստանձնած պարտավորությունն է:

«Եթե Դուք համարում եք, որ նոր ավտոբուսների ձեռքբերումը կոռուպցիա է, վերելակների փոխելը կոռուպցիա է, նոր աղբատար համակարգի ստեղծումը կոռուպցիա է, փողոցների լուսավորությունը, ճանապարհների ասֆալտապատումը կոռուպցիա է... այլ բան, որ գնումների և այլ ոլորտներում միշտ էլ ռիսկեր կան, և այդ ռիսկերը մենք էլ ենք բացահայտում, դուք էլ էք բացահայտում»,- ասաց նա:

Ինչ վերաբերում է Երևանի քաղաքապետի ընտրություններին, ապա Փաշինյանն ասաց, որ ոչ մի նոր տեղեկություն, բացի այն, որ ՀՀ օրենսգրքեվ սահմանված է, չի կարող ասել, որովհետև այդպիսի որոշումներ իրենք առնվազն այս պահի դրությամբ չունեն: