Փոխանակ հասարակական պարսավանքի ենթարկեք, մի հատ էլ ասում եք՝ մեր դավաճանները պուպուշ են, մեր դավաճաններին թաքուն պահեք․ Սուրեն Պապիկյան

Ազգային ժողովի «Հայաստան» խմբակցության պատգամավոր Աննա Գրիգորյանը մի շարք հարցեր ուղղեց Պաշտպանության նախարար Սուրեն Պապիկյանին։ Դրանք վերաբերում էին առաջնագծի կահավորմանը, Ազատ գյուղի զինվորական կացարանում տեղի ունեցած միջադեպին, Նիկոլ Փաշինյանի՝ էսկալացիայի մեծ վտանգի մասին հայտարարությանը, Ջերմուկում թշնամու կուտակումների մասին մամուլի հրապարակումներին, Փաշինյանի՝ 5-րդ շարասյան մասին հայտարարությանը։ 

«Երեկ էլ պարզվում է, որ 44-օրյա պատերազմում Հայաստանը պարտվել է, որովհետև ոչ թե զենք չենք ունեցել, ոչ թե ռազմական ներուժ չենք ունեցել կամ մարդկային ռեսուրսի խնդիր ենք ունեցել, այլ որովհետև բոլորը 5-րդ շարասյան ներկայացուցիչներ են եղել։ Սա երբ խոսում եք բանակում բարոյահոգեբանակա մթնորոլտի մասին, չե՞ք կարծում, որ սա ամենաշատն է վնասում բանակի մթնոլորտի կայուն պահպանմանը»,- ասաց Գրիգորյանը։ 

Նա նաև հարց ուղղեց Գորիս-Կապան և Կապան-Ճակատեն ճանապարհների մասին․ «2020թ․ նոյեմբերի 9-ի հայտարարությունից հետո մի հատ առանձին պայմանագիր է կնքվում, Ձեզ նախորդող Վաղարշակ Հարությունյանի կողմից՝ Նիկոլ Փաշինյանի հորդորով, որն այն մասին էր, որ զորքերը հետ են քաշվում մինչև Սյունիքի սահմանները, և, օրինակ, Գորիս-Կապան և Կապան-Ճակատեն ճանապարհների վերահսկողության մասին ռեժիմներ են սահմանվում, բայց որտեղ ամրագրվում են, որ հայկական մեքենաները, այդ թվում՝ բեռնատար, պետք է անխափան երթևեկություն իրականացնեն։ Բայց ինչպե՞ս է ստացվում է, որ նույնիսկ այդ վատ պայմանագիրը չի իրականացվում»,- հարցրեց Գրիգորյանը։

Ի պատասխան՝ Սուրեն Պապիկյանը հորդորեց չխեղաթյուրել Փաշինյանի խոսքը, որովհետև «բոլորը 5-րդ շարասյուն են» արտահայտությունը վատ արտահայտություն է, որը Գրիգորյանն անում է։

«Ոչ մեկ բոլորի մասին չի խոսել, խոսել են այն մարդկանց մասին, ովքեր դերակատարումը ստանձնել են կամ շարունակում են ստանձնած լինել, այդ թվում՝ քաղաքացիական կյանքում, կամ Ազգային ժողովում գուցե։ Մենք պետք է վերջապես իրականության հետ առերեսվելու կամք ունենանք։ Խոսքը հայոց պետականության մասին է, մեր պետականության լինելիության մասին է, և բնականաբար, բանակը դրա կարևոր բաղադրիչն է։ Եթե բանակում կան արատավոր երևույթներ ու խնդիրներ ու ընդդիմությանը կարելի է դրանից ամեն օր խոսել, մամուլին կարելի է ոչ մի բանից չխոսել, խոսել միայն Պաշտպանության նախարարի ու ԶՈւ-երում տեղի ունեցած վատ երևույթների մասին, որոնք նաև կան, և ամեն օր լրահոս դարձնել, էդ նրանից է, որ զբաղմունքը, պահանջը կամ գուցե պատվերը դրա մասին է, որովհետև դա թուլացնում է մեր պետականության կենսությանկությունը, ու ովքեր ծառայում են մեր պետականության կենսունակությունը թուլացնելուն, 5-րդ շարասյունը նրանց համար մեղմ ա, դա ավելի շատ նման ա դավաճանության»,- նշեց Պապիկյանը։ 

Անդրադառնալով Գրիգորյանի նշած պայմանագրին՝ Պնախարարն ասաց, որ իրավական ակտերին կամ փաստաթղթերին պետք է ճիշտ անուններ տալ։

«Ես որևէ պայմանագրի մասին տեղյակ չեմ, թե ինչ պայմանագրի մասին եք խոսում, և նաև դրա կարգավորումների, ով որտեղով պիտի անցնի, ինչ համակարգով պիտի անցնի։ Ինչ վերաբերում է այլ գնահատականներին՝ դավաճանությանը։ Երբ մարդը դավաճան է, դավաճության մասին չխոսե՞նք, եթե խոսում ենք հասարակության դաստիարակության մասին, այսինքն՝ մեզ պատի՞վ է բերում, որ մեր շարքերում դավաճաններ լինեն, կամ ԶՈւ որևէ սպա կարա դժգոհություն հայտնի՞, թե մեր դավաճաններին խի՞ եք բացահայտում։ Դա նվազագույնն է, որ արվում է, փոխանակ  հասարակական պարսավանքի ենթարկեք, մի հատ էլ ասում եք՝ մեր դավաճանները պուպուշ են, մեր դավաճաններին թաքուն պահեք։ Ոչ, պիտի հրապարակայնացվի և դա արմատախիլ արվի մեր հասարակությունից։ Ու բանակում դավաճանները, այո, ունենալ չեն կարող, 5-րդ շարասյունը ԶՈւ-ում անելիք չունեն, ԶՈւ անելիքը պաշտպանել ՀՀ սուվերեն տարածքը և մեր անվտանգությունը, ուրիշ անելիք չունի, այդ թվում՝ քաղաքական անելիք»,- ասաց նա։ 

Նրա խոսքով՝ ցանակցած պրոբլեմի մասին կարող են խոսել, ընդհուպ ամենայն մանրամասնությամբ և պատասխանատվությամբ, թե ովքեր է դրա համար պատասխանատու, ինքը չի խորշում, միշտ պատրաստ է։

«Առաջնագծում, այո, ամեն ինչ այնպիսին չէ, ինչպիսին կուզեինք բոլորս, այս պահին առաջին հերթին՝ ի պաշտոնե ես։ Ամեն ինչ արվում է, որպեսզի առաջնագիծն օր առաջ լինի ավելի ամուր։ Փակ քննարկման ժամանակ ես ձեզ ներկայացրել եմ, թե ինչ աշխատանքներ են տարվում։ Առաջնագիծը իդեալական չի, այդ թվում՝ սեպտեմբերյան դեպքերից հետո նոր առաջնագիծն ամբողջական կահավորման  կարիք ունի, խոսքը վերաբերում է նաև թիկունքային որոշակի ենթակառուցվածքներին։ Բանակում կա հսկայական անելիք,  և այդ անելիքը, որը ես ստանձնել եմ 1 տարի առաջ, ես հասցնելու եմ իր բարեհաջող ավարտին»,- ասաց նա։