Իշխանությունը պարգևատրել է Գյուրջինյանին լռության դիմաց

Շատ հաճախ են մարդիկ իրենք իրենց հարց տալիս, թե ինչպե՞ս և ինչո՞ւ մեր ազգը հարյուրամյակների ընթացքում փոքրացավ այս աստիճան, ինչո՞ւ մեզ կոտորեցին 100 տարի առաջ, ինչո՞ւ դրանից առաջ էլ մոտ 700 տարի ստիպված եղանք ապրել առանց պետականության։ Այս ինչուների շարքը երկար է։

Մեր ազգի անբախտ լինելու մասին պատումներ կարելի է գրել շատ երկար, ասել, որ փոքրացանք ու կոտորվեցինք, որովհետև աշխարհաքաղաքական խոշոր կենտրոնների խաչմերուկին էինք, որ մեր տարածքները այդ կենտրոններին պետք էին առանց մեզ։
Այո՛, կարելի է սա համարել սրտհովանք, բայց մեր թուլանալու, մաշվելու պատճառը ամենևին էլ դա չէ։

Այն շատ ավելի խորն է։ Մենք որպես ազգ պրծնում ենք, որովհետև ազգ պահող էլիտաներ չունենք, որովհետև իրենց էլիտաներ ներկայացնողները եղել են բոլոր ժամանակների իշխանությունների հաստիքային կցորդները՝ առաջնորդվող փողի դիմաց ծառայություն մատուցողի սկզբունքով։

Օրինակ մենք մտավորական ենք համարել Հենրիկ Հովհաննիսյանին, մի գիտնական կոչվածի, ում համար հայրենիք հանձնողից ստացած փողը քաղցր է այդ նույն հայրենիքից, իսկ հայրենիքը սոսկ կենացի թեմա. իրականը եղել է նյութականը, որ գալիս է Փաշինյանից՝ Արցախը և Հայաստանը թշնամու առաջ ծաղրի առարկա դարձրած ու թշնամուն մեզ ցեղասպանելու մանդատ տված մարդուց։

Մեր ողբերգությունը այն չէ, որ մեզանում կա մեկ Հենրիկ Հովհաննիսյան, այլ այն, որ այդ հենրիկհովհաննիսյանները շատ են և տարբեր ոլորտներում։ Ի՞նչ պակաս Հենրիկ Հովհաննիսյան է Լեզվի պետական կոմիտեի ղեկավար Դավիթ Գյուրջինյանը։

Գյուրջինյանին մինչև 2020 թվականը մարդիկ համարում էին ոչ ծառայամիտ մի լեզվաբան, բայց 2020 թվականի պատերազմից հետո չհանդգնելով մեկ բառով անգամ քննադատել այն իշխանությանը, որի շնորհիվ շուտով հայոց լեզվով խոսողները Հայաստանում իրենց տեղը կզիջեն ադրբեջաներերով և թուրքերենով խոսացողներին, Գյուրջինյանը ցույց տվեց, որ հատիքը կարևոր է հայրենիքից։

Պարզվեց, որ Գյուրջինյանը այնքան է սիրում իր մայրենին, որ Մայր Հայաստանը Ադրբեջանի և Թուքրիայի առաջ մատաղ անող ղեկավարին չի քննադատում, ինչը այդ նույն ղեկավարի կողմից արժանանում է գնահատանքի։

Իշխանությունը Գյուրջինյանին շռայլորեն պարգևատրեց իր լռության և ծառայամտության համար և այսօր և նրան օծեց Բրյուսովի անվան լեզվաբանական համալսարանի ռեկտորի ժամանակավոր պաշտոնակատարի պաշտոնում։

Դավիթ Գյուրիջինյանը մյուս «մտավորականների» պես այօսր հերթական անգամ ապացուցեց՝ մայրենիից թանկը փողն է ու հենց այդ փողի չափից է կախված սերդ առ մայրենի ...

                                                          NEWSPRESS.am